Pavarësisht punës së pandërprerë të forcave të shtuara operacionale, disa vatra zjarri mbeten ende problematike në territorin e vendit bën të ditur Ministria e Mbrojtjes.
Ministri i Mbrojtjes Niko Peleshi ka bërë një bilanc të situatë me zjarret në vend, ku tanimë ka vatra problematike edhe në Veri të vendit. Peleshi shprehet se Llogaraja konsiderohet si pika më e nxehtë dhe po punohet për shmangien e zjarrit në drejtim të Parkut.
Aktualisht është aktive vatra e zjarrit në Dukat të Ri. Pika kritike u izolua gjatë natës nga forcat operacionale, duke eliminuar rrezikun e kalimit të zjarrit në fshat, por përpjekjet për shuarjen e flakëve vazhdojnë nga toka dhe nga ajri. Serioze është situata pranë Parkut Kombëtar të Llogarasë, ku janë përqendruar të gjitha forcat, për të bërë të mundur normalizimin dhe izolimin e flakëve. Strukturat janë në ndjekje të dinamikës, e cila ndryshon për shkak të kushteve atmosferike.
“Në Karaburun nga tre vatra kemi dy sepse në Gjirin e Gramës është inaktive ndërkohë që vazhdon mbi Dukat dhe pranë Parkut të Llogarasë. Ka qenë një natë shumë e mundimshme mbrëmë. Vetëm rreth orës 3-4 të mëngjesit kanë bërë të mundur që zjarri të largohet nga fshati i Dukatit. Kanë qenë të rrezikuara banesat”, tha Peleshi.
I pyetur nëse punonjësit kanë mjetet e duhura për të shuar flakët, Peleshi tha ashtu e në të gjithë botët mjetet janë të pamjaftueshme. Ai u shpreh optimist për rezultatet e deritanishme duke falenderuar edhe helikopterët e ardhur nga Holanda dhe Çekia.
Ka dy helikopterë që kanë ardhur nga Holanda. Helikopteri i tretë është ai Çek dhe është në punë drejt Thirrës në Veri sepse është një prej dy vatrave problematike në Kukës. Llogaranë e konsiderojmë pikën më të nxehtë. Duam të shmangim kapërcimin e zjarrit drejt Parkut të Llogarasë”, u shpreh ministri i Mbrojtjes.
Situata
Pavarësisht punës së pandërprerë të forcave të shtuara operacionale, disa vatra zjarri mbeten ende problematike në territorin e vendit.
Aktualisht është aktive vatra e zjarrit në Dukat të Ri. Pika kritike u izolua gjatë natës nga forcat operacionale, duke eliminuar rrezikun e kalimit të zjarrit në fshat, por përpjekjet për shuarjen e flakëve vazhdojnë nga toka dhe nga ajri. Serioze është situata pranë Parkut Kombëtar të Llogarasë, ku janë përqendruar të gjitha forcat, për të bërë të mundur normalizimin dhe izolimin e flakëve. Strukturat janë në ndjekje të dinamikës, e cila ndryshon për shkak të kushteve atmosferike.
Një tjetër vatër serioze është ajo në fshatin Thirrë, në qarkun e Lezhës, ku puna vijon për vënien nën kontroll nga ana e FA, punonjësve të shërbimeve vendore, por edhe me ndërhyrje nga ajri. Vatra më e nxehtë është ajo në Majën e Rrunës, në Kukës pikërisht në pjesën sipër tunelit të Kalimashit. Është vënë nën kontroll vatra në zonën e quajtur Laku i Thive. Puna vijon edhe në pjesën që ndodhet në fshatin Munellë-Domgjon, në Mirditë, ku ka situatë aktive.
Janë raportuar edhe disa vatra të reja, njëra në fshatin Patalej në Lezhë, një tjetër vatër në Gjallicë në Kukës me përmasa të vogla si dhe një vatër në fshatin Cakran të Fierit, e cila ishte shuar 10 ditë më parë nga FA dhe është riaktivizuar. Si pasojë e përkeqësimit të gjendjes dhe përmasave që po marrin flakët kanë shkuar në ndihmë edhe 40 efektivë të FA.
Një vatër e re është njoftuar në pyllin e fshatit Gjorgos në Fier, ku për shuarjen e zjarrit janë angazhuar forcat zjarrfikëse të Rroskovecit.
Nën monitorim janë zjarret e rëna në fshatin Vermosh në Malësi të Madhe dhe në pyllin Shetaj afër Kepit të Rodnonit në Durrës. Këto vatra nuk paraqesin rrezik për zonat e banuara.
