Një zjarr masiv ka përfshirë pyjet me pisha në Voskopojë, në zonën midis Krushovës dhe Shipskës. Zjarri është aktiv prej disa orësh dhe ka përhapje të madhe.
Ende nuk dihet sipërfaqja që është duke u djegur, ndërsa në zonë kanë shkuar zjarrfikëse dhe punonjës shërbimi. Ndërkohë mësohet se drejt vendit është nisur edhe një helikopter për shuarjen e flakëve, pasi po i afrohen fshatrave dhe rrezikohen banesat dhe Kishat e famshme të kësaj zone.
Kjo vatër zjarri është aktivizuar prej disa orësh dhe emergjencat civile e kanë patur të pamundur të ndërhyjnë për ta vënë nën kontroll.
Në lidhje me këtë ka reaguar edhe Niko Peleshi.
“Nga Pashalimani drejt Voskopojës ku para pak minutash shpërtheu një vatër zjarri në pyllin me pisha pranë fshatit Krushovë. Forca zjarrfikëse nga detasmenti i mbrojtjes civile dhe forcat e Bashkisë Korçë po shkojnë me shpejtësi për të shmangur më të keqen”, shprehet ai.
Ndërkaq, raportohet se një tjetër zjarr ka rënë në fshatin Vadhizë, Fier. Ndërhyrja e forcave të policisë dhe të zjarrfikëses duke përdorur edhe mjete rrethanore kanë bërë të mundur eleminimin e zjarrit nga banesat. Zjarri po vijon në drejtim të pyllit dhe forcat e Policisë dhe zjarrfikëses po punojnë për vënien në kontroll dhe shuarjen e zjarrit.
/Priza.al/
