Shqipëria ‘lëngoi’ për disa javë nga zjarret pothuajse në të gjitha qytetet dhe hetimet policore kanë zbuluar se disa pjesë tyre janë të qëllimshme.
Në Mirditë dhe në Lezhë 3 persona do të vihen para përgjegjësisë. Është arrestuar 66-vjeçari Preng Luçia banues në fshatin Gjakëz. Ky i fundit ndezi në oborrin e banesës së tij një zjarr i cili më pas i doli jashtë kontrollit.
Zjarri i cili u përhap me shpejtësi në aksin rrugor Lezhë-Milot u shkaktua pasi 52-vjeçari Petrit Leka banues në Zejmen duke djegur një sipërfaqe të madhe me barishte dhe kullota u bë shkak që zjarrfikëset të alarmohen dhe të vihen në veprim për të shuar vatrat të cilat po u afroheshin banesave me shpejtësi.
Policia ka vendosur nën hetim Gjyste Vata 70 vjeçe, banuese në Balldren, e cila ka ndezur zjarr në kanalin kullues dhe më pas u përhap në bimësi. Sa i përket zjarreve në Gjirokastër janë vendosur nën hetim dy qytetarë.
Që nga shfaqja e zjarreve në vendin tonë, policia ka arritur që të arrestojë 20 persona, ka vënë nën hetim 20 të tjerë dhe ka shpallur në kërkim 5 të tjerë. Sipas Kodit Penal, parashikohet deri në 20 vite burg për autorët e djegies së qëllimshme të pyjeve dhe bimësisë nga Jugu në Veri të Shqipërisë.
/Priza.al/
