Në Afganistan nuk mund të priten mrekulli me talibanët nëpër këmbë…
Këta të fundit i janë kthyer sërish zakonit të vjetër, duke bërë krejt të kundërtën në orët e fundit në Afganistan, ndryshe nga se premtuan se nuk do të ketë hakmarrje apo sulm ndaj kundërshtarëve.
Kreu i një grupi që ofron shërbime inteligjente për Kombet e Bashkuara bën me dije se, talibanët kanë nisur bastisjet derë më derë në kërkim të personave që ndodhen në listën e tyre të të kërkuarve.
“Nga ajo që kemi parë së fundmi, talibanët kanë nisur lëvizjet në qytetet kryesore të Afganistanit dhe shihet se kanë një sistem më të përparuar inteligjence. Ata kanë një listë me persona të kërkuar ku përfshihen ish punonjës të qeverisë, në veçanti në shërbimet e inteligjencës dhe njësitë e forcave speciale”,- u shpreh Christian Nellemann, nga qendra norvegjeze për analizat globale.
Nellemann i frikësohet ekzekutimeve në masë, por edhe zbulimit të shumë metodave apo rrjeteve të inteligjencës që perëndimi ka ngritur në rajon.
Qendra Norvegjeze për Analizat Globale deklaroi më herët se talibanët kanë nisur rekrutimet për një rrjet të ri informatorësh për të bashkëpunuar me regjimin e tyre.
/Priza.al/
