Jo vetëm futbolli shqiptar është një harenë e shpeshtë sherresh masive ku tifozët ndodh që zbresin edhe në fushë duke u ndeshur edhe me policinë.
Këtë herë një sherr masiv ka mbërthyer futbollin francez dhe ka bërë xhiron e botës.
Skena të shëmtuara janë regjistruar në “Ligue 1” në derbin verior midis Lens dhe Lilë, ndërsa tifozët vendas pushtuan fushën dhe shkuan pas lojtarëve të skuadrës mike.
Pushtimi i fushës nga tifozët e Lens, bëri që loja të ndalet për gjysmë ore derisa situata të vihej nën kontroll. Pamjet e dëshmuara dje në mbrëmje në “Bollaert-Delelis”, kujtonin ngjarje të ngjashme në ndeshjen midis Nisës dhe Marsejës, në fillim të këtij sezoni.
Në atë lojë, ndeshja përfundimisht u ndërpre, kur ultrasit nga tifozët vendas hynë në fushë, për t’u përballur me lojtarët e Marsejës në “Allianz Riviera”.
Me atë rast, liga e “Ligue 1” goditi rëndë Nisën, duke i ndëshkuar me zbritje të dy pikëve, duke mbyllur stadiumin e tyre për dy ndeshje dhe duke urdhëruar një ndeshje në një stadium neutral.
Mbetet për t’u parë se si do të sillen autoritetet me Lensin, i cili fitoi 1-0 falë golit në pjesës së dytë të Przemislau Frankovski.
/Priza.al/
