Shtetet e Bashkuara dhe Ukraina filluan të hënën një stërvitje të përbashkët ushtarake.
Një raportim i Reuters citon një zëdhënës të ministrisë ukrainase të Mbrojtjes se në stërvitjen se “TRIDENT I RAPID – 2021”, që do të zgjasë deri më 1 tetor, po marrin pjesë 4.000 trupa ukrainase dhe 2.000 të huaja.
Stërvitja e radhës vjen pas stërvitjeve në shkallë të gjerë mes Rusisë dhe Bjellorusisë fqinje, ku ato angazhuan rreth 200 mijë trupa, duke alarmuar vendet e NATO-s.
Ukraina, në luftë me separatistët e mbështetur nga Rusia që nga viti 2014, ka kërkuar prej kohësh integrim më të ngushtë me ushtritë perëndimore me shpresën që një ditë t’i bashkohet NATO-s.
“Unë besoj se secili prej jush do të përqendrojë të gjitha njohuritë tuaja, të gjitha përpjekjet tuaja për t’i treguar vendeve agresore se nuk kanë asnjë shans,” tha Ihor Palahniuk, komandant trajnimi i forcave të Ukrainës, në ceremoninë e hapjes në Qendrën Ndërkombëtare të Sigurisë së Paqeruajtjes.
Në fakt, presidenti ukrainas, Zelensky ka kërkuar një përgjigje të prerë nga Perëndimi nëse kjo do të ndodh një ditë, por këto të fundit janë të përqëndruara aktualisht në reformat që vendi duhet të ndërrmarr.
Ushtria amerikane pohoi në një deklaratë se stërvitja përfshinte një ekip luftarak të brigadave të Gardës Kombëtare të Uashingtonit, të vendosur në Ukrainë që nga prilli, si pjesë e një force shumëkombëshe.
Trupa nga 12 vende gjithsej do të përfshiheshin, “për të rritur ndërveprimin mes vendeve aleate” dhe për të demonstruar gatishmërinë në rast agresioni. Në të njëjtën kohë, po të hënën, Rusia angazhoi rreth 20 anije luftarake në një stërvitje në shkallë të gjerë me zjarr të drejtpërdrejtë në Detin e Zi.
Përballja mes Rusisë dhe Perëndimit filloi në prill, kur e para zbarkoi ushtrinë e saj në kufirin e Ukrahinës Lindore. SHBA-ja vendosi sanksione shtesë ndaj Kremlinit dhe së bashku me aleatët e NATO-s bënë thirrje për tërheqje. Më 23 prill, Rusia u tërhoq me pretekstin se stërvitja kishte përfunduar.
Në qershor, Ukraina, Shtetet e Bashkuara dhe aleatët e tjerë mbajtën një stërvitje detare, Sea Breeze, në Detin e Zi dhe Ukrainën jugore, pavarësisht kërcënimeve ruse për anulimin e stërvitjeve.
Ndërkohë që një muaj më vonë Ukraina, Shtetet e Bashkuara, Polonia dhe Lituania mbajtën një stërvitje tjetër që përfshiu mbi 1 200 trupa.
Pas tërheqjes katastrofike nga Afganistani, Rusia vuri në dyshim aftësinë e SHBA-ve për t’iu përmbajtur angazhimeve të marra në Ukrahinë apo tjetërkund.
/Burimi: Reuters/ Përshtati Priza.al/
