Shqipëria nuk është i vetmi vend që po vuan largimin e popullsisë drejt vendeve të BE-së dhe boshatisjen e shumë fshatrave dhe qytezave nga banorët e tyre.
Ky “taksirat” i ka rënë edhe shumë shteteve të tjera të Ballkanit, madje edhe disa prej tyre që janë anëtarë të BE-së. Rezidentët e qytezave malore në Rumani kanë thënë se, egërsirat po pushtojnë tashmë shumë zona të banuara që janë kryesisht pranë zonave malore dhe pyjeve.
Sipas tyre, arinjtë e zbritur në qendrat e banuara po ua bëjnë jetën të mjeruar.
Grabitqarët madhorë janë lëshuar në qytezat rreth maleve Karpate, për të kërkuar ushqim pranë zonave urbane, duke tmerruar kështu fshatarët.
Shifrat tregojnë se sulmet e arinjve janë trefishuar mes viteve 2017 e 2019, me më shumë se 100 njerëz të plagosur.
Një nga arsyet për rritjen e prezencës së tyre, është masa e ndalimit të gjuetisë e vendosur në vitin 2016, e cila sipas banorëve, bëri arinjtë “të humbasin frikën e tyre nga njerëzit”.
Kafshët duket se, e kanë mësuar tashmë se qytezat janë një burim i sigurt ushqimi, dhe shpesh shihen duke gërrmuar në koshat e mbeturinave.
Një nënë e tre fëmijëve në Transilvani, tregon se, ariu erdhi për të kërkuar ushqim në kopshtin e saj dhe përmbysi tavolinën ku po luanin me letra ajo me bashkëshortin.
49-vjeçarja Monika tha për rrjetin “the Times”: “Çdo ditë është e njëjta histori e mallkuar. Arinjtë janë kudo. Nganjëherë duhet të thërresim policinë që të vijë t’i largojë në mëngjes kur duhet të dalim nga shtëpia dhe fëmijët duhet të shkojnë në shkollë”.
Vali Cristea është oficer i forcave speciale të policisë në qytezën rumune të Brașova-s, ku ai shpesh del në patrulla për të larguar arinjtë nga qendrat e banuara.
Ai tregon: “Kur unë nisa punë 20 vjet më parë, shumë rrallë shije një ari. Ndërsa tani i shikon tre-katër herë në një turn 10 ose 12-orësh”.
Tashmë njerëzit thonë se, kanë frikë të dalin natën dhe se lëvizin vetëm distanca të shkurtra me makinë.
Njerëzit mund të marrin leje për të vrarë arinjtë ‘problematikë’, por procesi thuhet se është shumë burokratik, pasi aplikimet duhet të merren në konsideratë nga gjashtë institucione të ndryshme.
Rumania, është kryeshteti i arinjve të Evropës, teksa në numërimin e vitit 2016, kishte të paktën 6000 arinj të murrmë rreth maleve Karpate, të cilat mbulojnë shumicën e territorit. Por numri i tyre i vërtetë mendohet të jetë tre herë më i madh se kaq.
/Burimi: The Times/Përshtati: Priza.al/
