Dhjetra parashuta fluturuan mbi Piramidat e Mëdha të Gizës, duke nisur festivalin e katërt ndërkombëtar të parashutizmit të quajtur “Kërce si Faraoni” në Egjipt.
Veprimtaria shtatëditore këtë vit mbledh mbi 200 parashutistë të huaj nga rreth 30 vende, duke përfshirë kampionët e botës dhe 135 parashutistë egjiptianë.
Veprimtaria, e organizuar nga kompania egjiptiane e investimeve sportive Skydive Egypt në bashkëpunim me Federatën Egjiptiane të Parashutizmit dhe Sporteve Ajrore, mbahet gjithashtu nën kujdesin e Ministrisë egjiptiane të Rinisë dhe Sporteve.
Parashutistët u hodhën nga një helikopter në një lartësi prej 15,000 këmbësh (mbi 4,500 metra të lartë), dhe spektatorët në vendin e piramidave mund të shihnin parashutat në qiell në një lartësi prej rreth 3,000 metra.
Kampionia franceze e botës, Karine Joly, një trajnere e parashutizmit që mban tituj dhe rekorde botërore, ka bërë deri më tani rreth 6600 kërcime në jetën e saj me parashutë, duke përfshirë 20 kërcime mbi piramida.
Parashutat shumëngjyrëshe tërhoqën sytë e spektatorëve rreth piramidave, të cilët përfshinin një numër zyrtarësh dhe diplomatësh nga vendet pjesëmarrëse që erdhën për të mbështetur sportistët e tyre.
