Kryeministri i Polonisë, Mateusz Moraëiecki ka hedhur akuza ndaj presidentit të Rusisë, Vladimir Putin për orkestrimin e një vale të paprecedentë migrantësh që përpiqen të hyjnë ilegalisht nga Bjellorusia në Poloni.
Polonia mbylli të martën një vendkalim kufitar me Bjellorusinë, pasi emigrantët në anën bjelloruse u përpoqën të çanin një gardh, për të hyrë në territorin e saj.
Kriza me emigrantë në këtë zonë po vazhdon prej muajsh. Bashkimi Evropian e akuzon udhëheqësin autoritar të Bjellorusisë, Alyaksandr Lukashenko, për nxitjen e fluksit, si hakmarrje për sanksionet që ka ndërmarrë BE-ja kundër regjimit të tij.
“Ky sulm që po bën Lukashenko e ka trurin e tij në Moskë; organizator është presidenti Putin”, tha Morawiecki në një seancë urgjente të Parlamentit polak.
Presidenti i Polonisë, Andrzej Duda, tha në një konferencë për media në Varshavë se “regjimi bjellorus po sulmon kufirin polak dhe BE-në në një mënyrë të pashembullt”.
“Aktualisht kemi një kamp emigrantësh, që janë të bllokuar nga pala bjelloruse. Janë rreth 1,000 njerëz, kryesisht të rinj. Këto janë veprime agresive që ne duhet t’i zmbrapsim, duke përmbushur detyrimet tona si vend anëtar i Bashkimit Evropian”, tha Duda.
Mijëra njerëz – kryesisht nga Lindja e Mesme dhe Azia – kanë bërë përpjekje për të kaluar ilegalisht kufirin e Polonisë, në muajt e fundit. Të martën, Lituania është bërë vendi i dytë i BE-së, pas Polonisë – që ka shpallur gjendje të jashtëzakonshme në kufirin e saj me Bjellorusinë, për shkak të krizës me emigrantë.
/Priza.al/
