Kreu i Partisë Demokratike, Lulzim Basha mëngjesin e sotëm është ndalur në një takim me banorët e Unazës së Re, shtëpitë e të cilëve u shemben pasi u prekën nga projekti. Gjatë takimit me to, Basha u ndal edhe te gjyqi i humbur në gjykatën e Arbitrazhit me Francesco Becchetti. Basha u zotua se me ardhjen e tij në pushtet 110 mln euro, Shqipëria nuk do i paguajë nga taksat e shqiptarëve, por sipas tij nga xhepat e pushtetarëve që kanë vjedhur buxhetin e shtetit.
“Të gjithë mafiozët janë bërë bashkë për të grabitur pronat dhe për t’u pasuruar në kurriz të njerëzve. Do t’i qëndroj pikë për pikë marrëveshjes me familjet e cenuara nga afera korruptive e Unazës së Re. Sot jam në mesin tuaj edhe për të thënë diçka tjetër, paratë që do t’u paguhen me vlerën e tregut për pronat e prishura me padrejtësi. Si çdo dëm tjetër i shkaktuar nga Edi Rama, përfshirë edhe atë faturë 110 milionë euro që do ta nxjerrë nga xhepat shqiptarëve.
Ne, një nga ligjet e para që do kalojmë është që këto para do t’i nxjerrim nga çdo pasuri e pushtetarëve që shkaktuan këto dëme. Nuk ka rëndësi nëse i kanë cash, konto bankare të fshehura. Do t’ua gjejmë në bashkëpunim me partnerët strategjik në çdo cep të globit. Në do tua konfiskojmë dhe do tua kthejmë qytetarëve”, tha Basha.
Ai është ndalur edhe në fushatën e bërë nga socialistët, e cila për Bashën nuk është gjë tjetër veçse sulm për kundërshtarët dhe jo prezantim i programeve.
“Nga mëngjesi në darke sulmon qytetarët, sulmon opozitën, sulmon mediat. Edhe në këto pak javë që i kanë mbetur do të vazhdojë të sillet si ariu i cirkut me shpresën se do ti gënjejë shqiptarët. A do e lini të keqen që kërkon mandatin e tretë të futet në shtëpitë tuaja? Sigurisht që jo. Shqipëria do ndryshim, Tirana do ndryshim, dhe ndryshimi ka mbërritur”, tha kryedemokrati.
25 prillin, Basha e sheh si ditën e rikthimit në normalitet.
“E shoh padurimin për ta hequr qafe këtë zgjedhë. Dua t’u them se 25 është dita juaj, kur fatin e keni në dorë ju. Një politikë me fytyrë njerëzore do të kthejë shërbimin ndaj njerëzve në qendër të saj dhe për këtë arsye vijmë para të gjithë shqiptarëve me një zotim se me ne demokracia është e garantuar, dhe plani ynë i zhvillimit ekonomik do sigurojë vende pune dhe paga të larta. Do vendosim drejtësi për pronat tuaja të grabitura”, vijoi Basha.
