Moderatorja Alketa Vejsiu, është dëshmi e një personi që ka ndjekur ëndrrën e saj dhe se për asnjë çast nuk është ndalur për të arritur qëllimin. Shumë kush mund ta mbajë mend Alketa Vejsiu në fillimet e saj në “Top Albania Radio”, ku drejtoi programet e para muzikore që sollën revolucion në konceptin e muzikës dhe prezantimit në Shqipëri.
Kthesën më të madhe profesionale do e merrte në moshën 17-vjeçare, asokohe kur regjisorja Vera Grabocka, do i besonte prezantimin e spektaklit “12 ëndrrat e një nate vere”, një format i dedikuar ndaj dansit sportiv evropian. Por përpara një karriere të gjatë e të bukur, edhe asaj i është dashur të bëjë disa punë të tjera për të arritur këtu ku është.
Në emisionin e djeshëm “Në kurthin e Piter Pan”, ka qenë e ftuar këngëtarja Anxhela Peristeri. Në diskutim e sipër, Alketa ka treguar se i mban mend fillimet e Anxhelës në performancën e saj të parë në Miss Albania 2001:
“Të mbaj mend”, i tha Alketa këngëtares, sepse edhe ajo vetë kishte qenë aty. Po çfarë bënte?
“Shisja bileta…” – tha duke qeshur Alketa.
Moderatorja shtoi se sapo kishte filluar të ishte asistente e spektakleve, sepse qëllimi ishte i qartë: “Doja të isha afër Vera production”.
