Prestigjozja britanike “The Sunday Times” i ka kushtuar një artikull Shqipërisë dhe marrëdhënieve të ngushta me Anglinë.
Po ashtu, kjo media bën dhe një përshkrim të kryeministrit shqiptar, Edi Rama dhe stilit të tij “të pazakontë”. Kryeministri artdashës i shtetit ish-komunist po konsiderohet nga Doëning Street si një mburojë pro perëndimore në Ballkan.
”Edi Rama është një kryeministër i pazakontë. Në tavolinën e tij shihen ngjyra, lapsa e vizatime të ndryshme. Po ashtu, edhe muret i ka të mbuluara me qindra vizatime abstrakte të krijuara nga vetë ai. Në paradhomën e tij, ka një kafaz me dy papagaj,” nis artikulli.
Qeverisja e Shqipërisë për tetë vjet nuk e ka penguar 57-vjeçarin Rama të përmbushë pasionet e tij artistike.
“Kur hyra në zyrën e tij, politikani socialist, i cili dikur luante basketboll, mezi ngriti sytë nga veprat e tij të fundit të artit surrealist. “Nuk e mendoj fare se çfarë vizatoj”, tha ai, ndërsa vazhdonte të skiconte.
”Është dora ime që e bën këtë. Më ndihmon shumë me përqendrimin dhe stresin”, tregon ai.
Shqipëria kohët e fundit është shfaqur si një mburojë pro perëndimore në Ballkan pasi Rusia dhe Kina po përfitojnë nga neglizhenca e Bashkimit Evropian ndaj këtij rajoni shpërthyes famëkeq.
Kjo është arsyeja pse Britania e Madhe ka nisur t’i bëjë elozhe Ramës, me shpresën për të rritur investimet në Shqipëri, një anëtare e NATO-s, dhe për të forcuar një marrëdhënie midis vendeve, që ka filluar një shekull më parë.
Kjo është një rilindje marrëdhëniesh që kishin vdekur që nga Lufta e Dytë Botërore e deri në vitin 1991. Këtë vit anijet luftarake britanike pritet të vizitojnë vendin për të marrë pjesë në stërvitjet e përbashkëta ushtarake.
Rama thotë se ka marrëdhënie të mira me Boris Johnson. Ata janë të dy ish-kryebashkiakë të kryeqyteteve të tyre, një rol në të cilin shqiptari la gjurmë kur urdhëroi që ndërtesat e zymta të epokës komuniste të pikturoheshin me ngjyra të ndezura dhe të theksuara.
Disa shtete ballkanike, të frustruara në radhën, në dukje statike, për anëtarësimin në BE, janë afruar me Moskën dhe Pekinin. Rama, megjithatë, këmbëngul se dekadat e izolimit të Shqipërisë nën Enver Hoxhën, për 40 vjet, paranojak dhe diktatori komunist i saj, nënkuptojnë se ajo mund t’i rezistojë “tundimit” për të bërë aleanca alternative gjeopolitike.
Edhe pse Rama e krahason kërkesën e Shqipërisë për anëtarësim në BE me dramën ”Në pritje të Godosë” të Samuel Beckett, ai është i përkushtuar t’i bashkohet bllokut.
”Ne jemi 100 për qind të përkushtuar ndaj hapësirës euro-atlantike”, thotë ai.
Ishte në Sarajevë, kryeqyteti i Bosnjes, 390 kilometra në veri të Tiranës, që një nacionalist serb shkaktoi Luftën e Parë Botërore duke qëlluar arkidukën Franz Ferdinand, trashëgimtarin e fronit të Austro-Hungarisë, në qershor 1914.
Tetëdhjetë vjet më pas luftërat në Jugosllavia çuan në vdekjen e 140 000 personave, me masakrat gjenocidale që bënë që NATO të urdhërojë avionët e saj luftarakë të bombardojnë Serbinë.
Së fundmi Serbia ka aplikuar për anëtarësim në BE, por ka mbrojtur interesat e saj duke blerë avionë luftarakë dhe tanke ruse. Moska, përmes aleatit të saj serb, dyshohet se po përpiqet të destabilizojë Kosovën, një vend pro perëndimor që aspiron gjithashtu anëtarësimin në BE, si dhe Bosnje-Hercegovinën, një tjetër aplikante për në BE.
“Unë mendoj se situata në Ballkanin Perëndimor është më e pasigurt se sa ka qenë në 20 vitet e fundit”, thotë Xhaçka, e cila është një nga 12 gratë në kabinetin e Ramës prej 17 ministrash.
“Kryeministri ynë ka një bindje të fortë se gratë bëjnë më mirë dhe janë më pak të korruptuara”, shton ajo.
Xhaçka ankohet për “premtimet e pambajtura” të BE-së ndaj atyre vendeve të Ballkanit në pritje të anëtarësimit.
”Ne mendojmë se ky nuk është një proces që po shpërblen punën tonë të palodhur, por është bërë më tepër politik, me shtete anëtare që llogaritin interesat e tyre”, shton ajo.
”Zgjerimi është bërë një nga këto çështje që askush nuk dëshiron ta trajtojë, veçanërisht gjatë fushatave zgjedhore”, thotë Xhaçka.
”Kjo po ndikon në besueshmërinë e BE-së”, tha Xhaçka.
“I mungon largpamësia strategjike”, ajo tha.
”Çfarëdo që të ndodhë në Ballkan ndikon në stabilitetin dhe sigurinë e Evropës. Nuk ka boshllëqe në gjeopolitikë, dhe nëse nuk jeni të angazhuar atje si vende perëndimore, atëherë boshllëkun do ta mbushin të tjerët”, thekson ajo.
Ajo përshëndet nivelin e ri të vëmendjes nga Britania e Madhe.
”Mbretëria e Bashkuar ka vendosur të jetë më e angazhuar, gjë që është fantastike”, tha ajo.
”Ky fokus i ri i gjetur është diçka nga e cila përfitojnë të gjithë: Mbretëria e Bashkuar dhe Bashkimi Europian”, shton Xhaçka.
Një ambasador evropian në Tiranë pranon se Shqipëria është një “aleat vendimtar i NATO-s” dhe shprehu keqardhjen për gjendjen e saj të vështirë për anëtarësimin.
“Ne nuk kemi bërë aq sa duhet për të shpërblyer suksesin e saj për reformat”, tha ai.
”Askush prej nesh nuk ka bërë përpjekje të mjaftueshme për t’i ndihmuar ata të hyjnë në BE. Ka rreziqe gjeopolitike. Duhet të investojmë më shumë”, theksoi ai.
Shqipëria, megjithatë, është shpërblyer për besnikërinë që ka treguar ndaj Perëndimit.
/Burimi: The Sunday Times/
