Ministria e Financave dhe Ekonomisë nuk ka nisur asnjë konsultim për ndryshimin e pagës minimale në vend.
Nga 1 janari 2021 hyri në fuqi vendimi për rritjen e pagës minimale nga 26,000 në 30,000 lekë (sipas VKM të miratuar më 16 dhjetor 2020). Pra paga bazë minimale mujore, në shkallë vendi për punonjësit, e detyrueshme për t’u zbatuar nga çdo person juridik apo fizik, vendas apo i huaj, vijon të jetë 30,000 lekë.
Kryeministri Edi Rama në nëntorin e vitit të kaluar, pas miratimit nga qeveria të projektligjit për uljen e tatimit mbi të ardhurat tha se do të ketë edhe rritje të pagës minimale me 2,000 lekë, por nuk qartësoi nëse vendimi do të hynte në fuqi në janar 2022 apo në muajin korrik. Kreu i qeverisë përsëriti premtimin elektoral se paga minimale brenda mandatit të tretë qeverisës do të arrijë në nivelin e 40,000 lekëve.
Drejtori i Përgjithshëm i Politikave Fiskale në MFE, Niko Lera tha për Monitor se paga minimale nuk ka ndryshuar, vazhdon të mbetet 30,000 lekë. Sipas tij nuk ka asnjë vendim se kur do të nisë puna për rishikimin e pagës minimale.
Paga minimale ndryshoi edhe në 2019. Nga 1 janari rroga minimale në shkallë vendi u rrit nga 24,000 në 26,000 lekë. Rritja ishte rreth 8 %.
Zbatimi i ndryshimeve në 2021 u kundërshtuan nga shoqatat e biznesit, pasi rritja e pagës minimale në nivelin e 30,000 lekëve, rriti rreth 28% detyrimet për kontributet shoqërore dhe shëndetësore. Kryetari i Qendrës të Eksporteve, Alban Zusi rekomandoi se për të zbutur efektet e barrës fiskale është e domosdoshme rrita e pragut për mostatimin e të ardhurave nga 30,000 lekë në 50,000 lekë.
Sakaq prej korrikut të këtij viti do të zerohet tatimi për pagat deri në 40 mijë lekë, ndërsa për pagat deri në 50 mijë lekë tatimi mbi të ardhurat do të përgjysmohet nga 13% që është aktualisht në 6,5%. Numri i tatimpaguesve që përfitojnë nga ulja e barrës tatimore për shkak të rritjes të pragut të patatueshëm deri në 40,000 lekë është rreth 71,500 dhe shuma e përfitimit është mesatarisht 7,800 lekë për tatimpagues/vit ose rreth 557 milionë lekë/vit për të gjithë tatimpaguesit. Gjithashtu, në të njëjtën linjë, për lehtësimin e barrës tatimore të shtresave në nevojë të popullsisë, me paketën fiskale u miratua që tatimpaguesit me të ardhura nga paga nga 40,001 lekë/muaj deri në 50,000 lekë/muaj, të vijojnë të paguajnë 0% tatim deri në shumën 30,000 lekë/muaj të ardhura nga paga, dhe ndryshe nga regjimi i mëparshëm, mbi shumën 30,000 lekë/muaj të paguajnë gjysmën e normës tatimore prej 13%. Sipas Ministrisë të Financave dhe Ekonomisë, numri i tatimpaguesve që përfitojnë nga kjo lehtësi tatimore është rreth 58,000 dhe shuma e përfitimit është mesatarisht 11,700 lekë për tatimpagues/vit ose në total 678 000 000 lekë/vit për të gjithë tatimpaguesit.
Ligji i ndryshuar “Për tatimin mbi të ardhurat” parashikon edhe ndryshimin e fashës së sipërme të taksimit progresiv. Nga 1 korriku i këtij viti, tatimi 23% parashikohet të fillojë të aplikohet në pagat mbi 200,000 lekë/muaj, nga 150,000 lekë/muaj që është aktualisht. Numri i tatimpaguesve që përfitojnë nga kjo lehtësi tatimore është rreth 5,900 dhe shuma e përfitimit është mesatarisht 23,000 lekë për tatimpagues/vit ose në total 135,000,000 lekë për të gjithë tatimpaguesit.
