Mbretëresha Elizabeth ka njoftuar sot me hidhërim të thellë, vdekjen e burrit të saj Princ Philip-it, në moshën 99-vjeçare. Ajo e konsideronte Philipin si forcën e saj gjatë martesës së tyre 73-vjeçare dhe mbretërimit të saj gjatë 69 viteve. Duka i Edinburgut i kaloi ditët e tij të fundit në Windsor Castle me bashkëshorten, pas një qëndrimi 28-ditor në spital pasi kishte shfaqur probleme me zemrën.
“Madhëria e saj Mbretëresha shpall me hidhërim të thellë vdekjen e burrit të saj të dashur, Lartmadhërisë së Tij Princit Philip, Dukës së Edinburgut. Ai ndërroi jetë paqësisht këtë mëngjes në kalanë Windsor. Njoftimet e mëtejshme do të bëhen në kohën e duhur. Familja Mbretërore bashkohet me njerëz në të gjithë botën për të mbajtur zi për humbjen e tij”, thuhet në deklaratën e pallatit Buckingham.
Duka ishte burimi më i madh i mbështetjes për Mbretëreshën, i besuari i saj dhe njeriu tek i cili ajo mbështetej mbi gjithë të tjerët. Ai ishte gjyshi i dhjetë nipërve e mbesave. Martesa e tij me mbretëreshën ishte një nga marrëdhëniet më të njohura në botë. Çifti u martua në nëntor të vitit 1947. Ajo ishte një princeshë 21-vjeçare, kurse ai oficer i marinës me gjak mbretëror grek e danez. Ditën që ai u bë duka i Edinburgut, ishte gjithmonë aty, i gatshëm t’i jepte mbretëreshës Elizabet mbështetje dhe ndihmë.
Megjithëse Philip ishte në gjendje të mirë shëndetësore deri në të 90-at, ai së fundmi kishte shfaqur probleme me zemrën. Ndërsa bota po vuan ikjen e tij, Philip do të mbahet mend gjithmonë për rolin e madh që luajti në jetën e njerëzve në Britani dhe Komonuelth. Mbretëresha tani do të përballet me sfidën e saj më të madhe nga të gjitha, teksa do të udhëheqë vendin për herë të parë pa burrin e saj besnik pranë.
Përshtati:Priza.al/Burimi:DailyMail
