Shqiptarët gjithmonë janë karakterizuar nga talenti i madh. Edhe pse një vend i vogël, emrat dhe veprat e shqiptarëve njihen dhe pëlqehen nëpër botë, ndoshta më shumë se në Shqipëri.
Rasti kokret është i piktores Suale Pulaha Brown, e cila dekorohet me dy çmime të para.
E njohur për portretin “Perla” të divës Tefta Tashko Koço dhe vlerësimeve nëpër evenimente artistike në Angli, Brown është rikthyer sërisht me artin e saj.
Mbas ekspozitës vetiake të Korrikut 2021 ne Angli, piktorja shqiptare rikthehet me artin e saj në një pjesëmarje të re në një prej evenimenteve më të rëndësishme artistike të jetës së qytetit ku banon në Angli përgjatë këtij muaji, Mars 2022.
Muzeu dhe Galeria e Artit të qytetit në bashkëpunim me bashkinë, organizon një nga ekspozitat artistike më vibrante të vitit. Në këtë ekspozitë piktorja u paraqit me katër punime, ndër të tjera portreti në vaj i mbretëreshës Zheraldine (që u vlerësua me çmim të parë në kategorinë përkatëse), si dhe punimet në miniaturë të cilat jo vetëm u vleresuan me çmim të parë në kategorinë përkatëse por u perzgjodhën si punimi më i mirë i gjithë ekspozitës dhe u vlerësuan me kupën e festivalit (The Diamond Anniversary Cup) të prezantuar nga kryebashkiaku i bashkisë.
Piktura në miniaturë në gur ishte nje pasion që piktores i lindi përgjatë karantinës. Në koleksionin e miniaturave me të cilat piktorja u përfaqësua në ekspozitë perfshihen edhe portreti i Nënë Terezës, si dhe miniatura më e vogël e Monalizës me përmasa 1.5 cm.
Edhe pse kjo periudhë dy vjeçare nuk ka qenë e lehtë, ku dhe ekspozitën e Korrikut 2021 piktorja e çeli në një periudhë kur rregullat e distancimit social ishin ende strikte, ajo shprehet se “ishte një thirrje e përbrendshme që me artin e saj t’i ofronte publikut artdashës disa momente larg stresit dhe negativitetit të situatës që i ka rënduar së tepermi njerezit”. Ndërsa në pjesëmarjen e këtij viti Piktura e Mbretereshës Zheraldine tërhoqi një vëmendje të veçantë dhe një kureshtje të jashtëzakonshme si nga juria ashtu dhe nga vizitorë të shumtë. Gjithashtu, në ditën e ceremonisë së ndarjes së çmimeve, kishte një kureshtje të madhe mes shumë artistëve të dinin se cili ishte autori i kësaj pikture.
Organizatorët e Ekspozitës, juria, kryebashkiaku ishin ndër ata që shprehën vlerësimin ndaj pikturave te saj.
“Ne artistët mbartim një dritë qe jep shpresë”, shprehet piktorja korçare. Edhe pse arti ynë nuk mund të ndryshojë realitetin, sipas saj arti jep shpresë në kohët më të erëta, ndaj inkurajon të gjithë artistët të vazhdojnë të krijojnë, ekspozojnë artin e tyre dhe të japin shpresë dhe frymëzim. Në veçanti piktorja dëshiron të falenderojë publikun artdashës shqiptar që e mbështet dhe e inkurajon pergjate udhëtimit të saj artistik./Priza.al
