A do ketë konsensus mes Ramës dhe Berishës për presidentin siç ndodhi për Anastas Angjelin?

Kanë ndodhur disa episode “të çuditshme” gjatë kohës në fundit në parlament, ku deputetë të njohur si përkrahës të Sali Berishës dhe “Foltores” kanë bashkuar vota me mazhorancë e Edi Ramës, ose kanë bojkotuar votimin e raportit të opozitës të dalë nga Komisioni Hetimor.
Së fundmi ish-ministri socialist, Anastas Angjeli, të cilin dikur vetë Berisha e ka cilësuar si “Mamuth të korrupsionit”, është zgjedhur anëtar i Bordit të Bankës Qendrore me 92 vota, ndërkohë që mungonin pesë deputetë socialistë.
Pra plot 20 vota pro Angjelit që ishte propozim direkt i Edi Ramës, u dhanë më së shumti grupi i Rithemelimit në parlament. Në këtë situatë Sali Berisha, është pyetur në Shkodër për çështjen e presidentit të ri dhe mundësinë e një konsensusi me Ramën për emrin e tij.Berisha është treguar i prerë duke e cilësuar Ramën një “Judë” që nuk mund ti besohet dhe premtoi, se nuk do të votonin kurrë një propzim të kryeministrit.
“Më pyesni mua për propozimet e Edi Ramës, unë nuk merrem me to. Nuk merremi me thashetheme. Ne merremi me gjërat e vërteta. Nuk kemi një propozim për President nuk kemi. Absolutisht, nuk votojmë në asnjë mënyrë kandidatët e Edi Ramës. Të votosh kandidatët e Edi Ramës do të thotë ta replikash, të çosh në Presidencë kopjen e tij. Konsensusi me Edi Ramën është të puthesh me Judën. Ai vuan nga kompleksi i vdekjes dhe në gjumë ngrihet llahtar nga unë”, deklaroi Berisha.
Por kohët e fundit po përflitet se në përpjekje për të rregulluar balancat e pushteteve dhe institucioneve në Shqipëri (pasi janë në grushtin e Ramës), ndërkombëtarët po ndërmjetësojnë që presidenti pas largimit të Ilir Metës, ti jepet një emri afër opozitës.
Kjo do të ndodhte vetëm me dëshirën (ose detyrimin nga ndërkombëtarët) e Edi Ramës pasi presidenti zgjidhet në parlament vetëm me një shumcë të thjeshtë (71 vota) në raundin e fundit të cilën Rama e ka dhe tejkalon shumë.