Një ngjarje e rëndë ka ndodhur në Elbasan ku një 34-vjeçare ka humbur jetën pasditen e djeshme pas komplikacioneve shëndetësore që i solli aborti i fëmijës.
Lidhur me këtë rast, janë proceduar penalisht dy mjekët e maternitetit, shtetasit A.P. 56 vjeç dhe B.Gj. 60 vjeç.
Uniformat blu raportojnë se 34-vjeçarja u paraqit dje rreth orës 12:00 në maternitetin e Elbasanit ku kreu një procedurë aborti. Më pas, e reja u largua për në banesë, ndërkohë që disa orë më vonë, ajo njoftoi ambulancën pasi gjendja shëndetësore u përkeqësua. Policia bën me dije se e reja u dërgua në maternitetin e Elbasanit, ku ndërroi jetë.
Njoftimi i policisë:
Më datë 30.01.2023, rreth orës 12:00, një shtetase 34 vjeçe është paraqitur në ambientet e Maternitetit të Elbasanit, ka kryer një procedurë aborti dhe më pas është larguar në banesë. Rreth orës 18:00 të së njëjtës ditë, dyshohet se për shkak të komplikimeve të gjendjes shëndetësore, kjo shtetase ka njoftuar shërbimet e ambulancës, të cilat e kanë transportuar atë në Maternitetin e Elbasanit, ku kjo shtetase ka humbur jetën.
Për këtë rast, oficerët e Policisë Gjyqësore të Prokurorisë pranë Gjykatës së Rrethit Gjyqësor Elbasan kanë iniciuar procedimin penal për shtetasit A. P., 56 vjeç dhe B. Gj., 60 vjeç, mjekë në Maternitetin e Elbasanit, për veprën penale “Neglizhenca në trajtimin mjekësor”. Vijon puna nën drejtimin e Prokurorisë, për zbardhjen dhe dokumentimin e plotë ligjor të këtij rasti.
