Një aksident i rëndë ka ndodhur mëngjesin e sotëm në qytetin e Vlorës, në rrugën “Transballkanike”, ku një grua rreth të 60-ve u përplas nga një furgon ndërsa kalonte te vizat e bardha. Ngjarja u raportua rreth orës 09:00, kur policia lokale mori njoftimin për incidentin.
Shoferi i furgonit, i cili dyshohet se nuk ka qenë i vëmendshëm, goditi gruan në momentin që ajo kalonte. Ajo mori dëmtime dhe u dërgua menjëherë në spital, ku aktualisht ndodhet nën kujdesin e mjekëve dhe jashtë rrezikut për jetën.
Policia ka filluar hetimet dhe ka shoqëruar drejtuesin e mjetit për t’iu nënshtruar procedurave të nevojshme.
