Një ekspeditë mes një grupi miqsh ka përfunduar në tragjedi. Ekipi i përbërë nga gazetari Alfred Lela, Ilir Shyti inxhinier pyjesh, operatori Gisel Dollani, Dorien Malaj dhe Ndoc Mulaj, specialist i turizmit teksa po ngjisnin malin pasditen e kësaj të enjteje janë rrëzuar duke rënë në humnerë për shkak të stuhisë së fortë të dëborës dhe erës, për pasojë ka humbur jetën ky i fundit.
Mulaj ka marrë plagë të rënda në kokë, teksa trupi i tij u gjet pas disa orësh kërkimesh pasi ishte i zhdukur dhe nuk dihej asgjë për fatin e tij. Ndërkohë, sa i përket gjendjes shëndetësore të 4 personave të tjerë, Shyti, inxhinier i pyjeve është rëndë, e ndërsa tre të tjerët, mes tyre dhe gazetari Alfred Lela janë jashtë rrezikut për jetën.
Lela ka treguar me detaje atë se çfarë ka ndodhur, e ndërsa është shprehur se situata ka qenë aq e vështirë sa që ka menduar se nuk do dilte i gjallë prej aty. Ai rrëfeu se teksa kanë prekur majën, një stuhi e fortë ka përshkruar zonën duke e bërë më të vështirë lëvizjen e tyre, për pasojë janë rrëzuar. Ai pranoi gjithashtu se mendoi se sot do të humbiste jetën.
“E kapëm majën, aty nisi një stuhi që frynte në dy krahët dhe na bëri të pamundur kapërcimin në anën tjetër të majës për t’u ulur në një drejtim tjetër. Era ishte e tillë sa që na merrte mbrapsht. U detyruam të iknim mbrapsht. Ishim pa fat, sepse era dhe i ftohti kishin mbuluar gjurmët duke e bërë uljen më të vështirë. Në përpjekje për t’u ulur kemi rrëshqitur 3 prej nesh, unë i pari. Me ndihmë të Zotit jam ndalur aty ku nuk mendoja se do të ndalesha më, mendoja se e kisha mbyllur me këtë botë. Më ka ndaluar një objekt pa shkuar në anën tjetër të shkëmbit. Kyçi besoj që është thyer, shpresoj të jetë ndrydhur. Kjo është rezymeja. Ne jemi grup që bëjmë ekspedita prej shumë vitesh. Ishim një grup miqsh që do të bënim ngjitjen e fundit të vitit e ndërkohë unë dhe kameramani po xhironim e filmonim”, tregoi gazetari Alfred Lela.
Për fatin e keq, alpinisti që u plagos rëndë pasi ra në humnerë Ndoc Mula ndërroi jetë si pasojë e plagëve të rënda. Ai u gjet pas 6 orësh kërkimi për shkak të errësirës, terrenit të vështirë dhe motit të keq.
/Priza.al/
