Policia e Shkodrës ka zbardhur detaje dhe prova në lidhje me atentatin e ndodhur tre ditë më parë, ku automjeti i një 25-vjeçari u qëllua me armë zjarri.
Mësohet se ngjarja ka ndodhur për motive të dobëta, pasi para dy vitesh Alban Bruçi është konflikutar me shtetasin Tornato Fusha.
Shtetasit Bajram Cerkoja dhe Tornato Fusha akuzohen për veprat penale “Vrasja me paramendim”, mbetur në tentativë, “Mbajtja pa leje e armëve dhe e municionit luftarak”, si dhe “Prishja e qetësisë publike”.
Njoftimi i policisë:
Shkodër/Zbardhet dhe dokumentohet me prova ligjore, ngjarja e ndodhur më datë 25.08.2022, ku është qëlluar me armë zjarri në drejtim të automjetit që drejtohej nga shtetasi A. B.
Identifikohen dhe shpallen në kërkim autorët e dyshuar të kësaj ngjarjeje.
Strukturat hetimore të DVP Shkodër dhe të Komisariatit të Policisë Shkodër, si rezultat i një pune të pandërprerë hetimore, në bashkëpunim me Prokurorinë e Rrethit Gjyqësor Shkodër, kanë bërë të mundur identifikimin dhe shpalljen në kërkim të shtetasve:
-T. F., 20 vjeç dhe B. Ç., 24 vjeç, të dy banues në Shkodër.
Nga veprimet hetimore dhe procedurale të kryera për këtë ngjarje, ka rezultuar se para 2 vitesh, shtetasi A. B. është konfliktuar për motive të dobëta me shtetasin T. F. Ky konflikt dyshohet të jetë motivi pse shtetasit T. F. dhe B. Ç. qëlluan me armë zjarri, mbrëmjen e datës 25.08.2022, automjetin që drejtohej nga shtetasi A. B.
Vijon puna nga ana e strukturave të Policisë për lokalizimin dhe kapjen e këtyre shtetasve.
Materialet iu referuan Prokurorisë së Rrethit Gjyqësor Shkodër, për veprime të mëtejshme, për veprat penale “Vrasja me paramendim”, mbetur në tentativë, “Mbajtja pa leje e armëve dhe e municionit luftarak”, si dhe “Prishja e qetësisë publike”.
