Ish-kryeministri Sali Berisha, ka zhvilluar këtë të premte takimin me qytetarët në Sarandë.
Gjatë fjalës së tij, Berisha u shpreh se Edi Rama e shndërroi vendin në delen e zezë të Ballkanit.
Drejtuar mbështetësve në këtë “foltore”, ish-kryeministri tha se Kuvendi do të mblidhet dhe se do të vendosen normat më demokratike, për të ngritur një opozitë fitimtare.
“Ju falënderoj për mbështetjen tuaj dhe shpreh mirënjohjen e pakufishme për ju. Në një moment ndër më kritikët në jetën e demokracisë shqiptare dhe PD , u ngritët fuqishëm në atë të cilën u e quaj mrekullinë më ta madhe shqiptare që nga dhjetori i ’90. Janë idealet tuaja demokratike, guximi, vizioni që në çastin më kritik kur narkoshteti shqiptar i drejtuar nga Rama shndërroi ‘de fakto’ PD-në. U ngritët më të vendosur se kurrë pa përfillët asnjë presion dhe për herë të parë në historinë e Shqipërisë ndoshta edhe të Europës ju me firmën tuaj u bëtë zotër të PD dhe pluralizmit shqiptar.
Ju firmosët për të marrë në dorë Kuvendin, organin më të lartë si një akt shqiptar. Edi Rama festoi para kohë marrjen peng të pluralizimit. Ai mendoi se i lau duart me partinë demokratike dhe se tani do të mund të vendoste çdo gjë në këtë vend, pasi regjistroi rekordet më të zeza, shndërroi Shqipërinë në delen e zezë të Ballkanit dhe të Europës. Ai nxori në treg kufijtë e Kosovës dhe jo më pak të Shqipërisë, Rama u gabua shumë rëndë sepse llogariti peng kryetarin dhe nuk ju llogariti ju që nuk shiteni dhe nuk bliheni që nuk i nënshtroheni. Foltorja është pa asnjë diskutim mrekullia më e madhe e viteve të fundit. Tashmë jeni ju në mbështetje të vlerave të lirisë. Garantoj se ne që çmontuam sistemin komunist ne do të çmontojmë narkoshtetin shqiptar”, tha më tej Berisha.
/Priza.al/
