Kryeministrja e Serbisë, Ana Bërnabiq, ka folur për një konflikt të mundshëm të armatosur në seancën e Konventës Kombëtare në Parlamentin e Serbisë, raporton B92.
Bërnabiq u ka thënë organizatave joqeveritare, që të “flasin për torturat e përjetuara nga serbët në Kosovë e M.”.
“Ne jemi në prag të një konflikti të armatosur falë lëvizjeve të njëanshme të Prishtinës. Organizatat të shoqërisë civile, ju lutem flisni për torturat e përjetuara nga serbët në Kosovë e M. Ne duhet ta ruajmë paqen së bashku”, tha Bërnabiq.
Ajo ka pyetur se si është e mundur “që në Evropë të mos ketë asnjë informacion për një të arrestuar tash e 12 ditë”.
Ka aluduar në ish-policin e Kosovës, Dejan Pantiq, që u arrestua dhe gjendet në paraburgim nën akuzat për sulm terrorist dhe sulm ndaj rendit kushtetues të Kosovës.
Ish-pjesëtari i MUP-it të Serbisë akuzohet se ishte prapa sulmeve me shok-bomba në zyrat e komisionit komunal zgjedhor në veri.
Bërnabiq ka thënë se arrestimi i Pantiqit, e po ashtu ruajtja e Marrëveshjes së Brukselit dhe formimi i Asociacionit, janë arsyeja “pse serbët gjenden në barrikada”.
Është dita e 12-të që kur barrikadat janë vendosur në rrugët që çojnë në pikat kufitare në Jarinjë e Bërnjak. Këto pika vazhdojnë të mbesin të mbyllura.
