Mungesa e konkurrencës në ekonominë amerikane mendohet se po rrit çmimet dhe i kushton familjeve atje rreth 5 mijë dollarë çdo vit. Presidenti amerikan, Joe Biden, ka nënshkruar së fundmi një urdhër ekzekutiv, me qëllim të promovimit të konkurrencës. Ky veprim vë në pah dëshirën e kreut të Shtëpisë së Bardhë për masa më të rrepta ndaj kompanive të mëdha teknologjike, të cilat administrata e tij i ka akuzuar për “dëmtim të konkurrencës”. “Kapitalizmi pa konkurrencë, nuk është kapitalizëm. Është shfrytëzim”, ka thënë Biden teksa ka nënshkruar urdhrin.
Presidenti Joe Biden firmosi të premten një dekret me aksione dhe rekomandime konkrete për të ulur kostot e konsumatorëve, për të rritur pagat dhe për të promovuar rritjen ekonomike. Kreu i shtetit tha se kapitalizmi amerikan bazohet te gara e hapur dhe konkurrenca e drejtë, porse monopolet e mëdha i kanë abuzuar parimet.
Në të përfshihen 72 veprime dhe rekomandime, që përfshijnë 10 agjenci. Në urdhër sugjerohet që problemet janë rritur pasi kompanitë e mëdha teknologjike kanë mbledhur shumë informacione personale, kanë blerë konkurrentët potencialë dhe kanë garuar në mënyrë të padrejtë me bizneset e vogla.
Në mesin e rekomandimeve është përfshirë edhe vëzhgimi më i madh i blerjeve në sektorin e teknologjisë, rregulla të reja që do të përcaktohen nga Komisioni Federal i Tregtisë për mbledhjen e të dhënave dhe ndalimi i metodave të padrejta të konkurrencës në tregjet e internetit.
Administrata e Bidenit pritet të shënjestrojë edhe një numër sektorësh tjerë me këtë urdhër. Në dokumentin e nënshkruar, inkurajohen agjencitë tjera qeveritare që të marrin hapa për të përmirësuar konkurrencën në fushat për kujdes shëndetësor, udhëtime dhe bujqësi.
Megjithatë, urdhri ekzekutiv, nuk nënkupton që rekomandimet e bëra do të nisin të fuqizohen menjëherë. Agjencitë qeveritare gjegjëse duhet të zbatojnë ndryshimet e nevojshme, derisa disa elemente mund të jenë subjekte të proceseve gjyqësore.
/Burimi: BBC/ përshtati në shqip Priza.al/
