Egjipti ka kërkuar 900 milionë dollarë dëmshpërblim pas bllokimit të Kanalit të Suezit në fund të muajit mars. E përditshmja qeveritare Al-Ahram njoftoi se anija kontejner që shkaktoi bllokimin është sekuestruar.
Kreu i Administratës së Kanalit të Suezit (SCA) tha se po zhvillohen negociata për kompensimin e dëmit të shkaktuar nga Ever Given, i cili ngeci në kanal dhe paralizoi trafikun në një rrugë kryesore detare. Egjipti pretendon se nuk bëri asnjë gabim në incident dhe e zhvendos përgjegjësinë te anija.
“Negociatat po vazhdojnë, ka ende shumë pika të pakoordinuara me kompaninë dhe sigurimin, duke filluar me shumën”, tha admirali Osama Rabie.
Një burim nga SCA konfirmoi për “France Presse” se negociatat janë duke u zhvilluar me kompaninë japoneze Shoei Kisen, e cila zotëron anijen dhe me kompanitë e sigurimeve. Admirali pohoi se egjiptianët po kërkojnë 900 milionë dollarë.
“Anija panameze Ever Given është konfiskuar për mospagim të 900 milionë dollarëve”, tha burimi.
