Të enjten është raportuar sërish për garantime në centralin bërthamor në qytetin ukrainas, Zaporizhja.
Ky njëherësh është centrali më i madh në Evropë.
Rusia dhe Ukraina kanë fajësuar njëra-tjetrën për 10 granatime të kryera në këtë central.
Sekretari i Përgjithshëm i Kombeve të Bashkuara, Antonio Guterres ka paralajmëruar se luftimet mund të “rezultojnë me katastrofë” në këtë central, të cilin e kontrollon Rusia nga muaji mars.
Ukraina ka paralajmëruar se Rusia mund të provokojë aksidentin më të rëndë bërthamor në botë.
Të mërkurën, ministrat e Jashtëm të shtatë vendeve më të industrializuara (G7), kanë thënë se Rusia duhet t’ia dorëzojë menjëherë Kievit kontrollin e centralit.
Ky central është granatuar edhe javën e kaluar.
Ukraina ka thënë se Rusia e ka shndërruar këtë zonë në bazë ushtarake për të nisur sulmet prej atje, duke e ditur faktin se forcat ukrainase nuk mund të hakmerren.
Moska, në anën tjetër, hedh poshtë këto pretendime.
Presidenti rus, Vladimir Putin, ka urdhëruar pushtimin e Ukrainës më 24 shkurt.
Ai e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra./REL
