Ditën e sotme është zhvilluar Komisioni për Çështjet Ligjore, ku edhe u diskutua projektligji “Për buxhetin e vitit 2023”, lidhur me institucionet si; Komisioni i Pavarur i Kualifikimit, Kolegji i Posaçëm i Apelimit dhe Komisionerët Publikë.
Përfaqësuesja e KPA-së, Albana Shtylla ka bërë një përmbledhje të projektbuxhetit paraprak, ndërsa për këtë ka reaguar edhe deputeti i PD-së Oerd Bylykbashi.
Gjatë fjalës së tij në Komision, Bylykbashi tha se nuk ka vend për shpenzime luksi ndërkohë që shtoi se kostot për KPA në këtë kohë krize janë shumë të larta. Një replikë ka ardhur nga Shtylla ku thotë që zbatimi i ligjit duhet të burojë nga ligjvënësit dhe më tej të zbresë në organe të tjera, pra jemi të detyruar të zbatojmë ligjin.
Pjesë nga diskutimi:
Bylykbashi: E keni ende atë buxhet në shpenzimet tuaja për sigurimin e jetës dhe të shëndetit. Sa është kjo vlerë. Në dijeninë time jeni të vetëm institucione që keni trajtim preferencial pavarësisht sa është buxheti me kushtet e vështira që kemi ne dhe duke konsideruar që bëni punë të vështirë por, jo me shumë rrezik se edhe institucione te tjera, përse ëshë e nevojshme të vazhdojë ky fond, është e rëndësishme në kushtet e vështirësisë që kemi, vend për luks nuk kemi. Në gjykimin tim një shpenzim i tillë është luks dhe në dijeninë time nuk ka pasur asnjë moment që ka cënuar shëndetin dhe jetën e anëtarëve të dy trupave. A gjykoni që është e nevojshme për tu hequr kjo dhe këto para të kalohen për shpenzime të tjera, pra dua të di shifrën sa është parashikuar?
Shtylla: Ka një parashikim në ligj ku deputetët kur kanë miratuar ligjin kanë vlerësuar se dihet të ketë një trajtim të tillë. Mendoj që zbatimi i ligjit duhet të burojë nga ligjvënësit dhe më tej të zbresë në organe të tjera, pra jemi të detyruar të zbatojmë ligjin. Nga ana tjetër sa i përket vlerës për të gjithë personelin e kolegjit është një vlerë prej 7 mln lekësh viti. Duke dashur të mbroj një të dhënë personale, më besoni që ka patur raste dhe vazhdon të ketë. Ligji nuk ka paraparë cënim jete, për çështje të shëndetit. Unë them që ka patur dhe ka në mënyrë të vazhdueshme. Pra ne mendojmë që është i domosdoshëm për të krijuar qetësinë, të paktën të kenë të qetë pjesën tjetër të jetës së tyre në drejtim të shëndetit.
