Në orën 14:30 i dyshuari për vrasjen e nënës së tij, Urim Hyseni u paraqit në gjykatë për masën e sigurisë.
Mësohet se psikiatri që ka qenë prezent në intervistimin e Hysenit nga Prokuroria ka konkluduar se ai është në gjendje të paraqitet para gjykatësit.
Në deklaratën e tij, Hyseni ka thënë që deri te akti ka ardhur për shkak të problemeve me të ëmën, pasi sipas tij ajo i përzihej në punët e tij personale. Ai ka pranuar që ka kryer krimin dhe do mbrohet në heshtje.
Gjatë ditës së djeshme, pas arrestimit nuk ka qenë në gjendje të flasë e po ashtu ka ndërruar avokatët. Ekzaminimi i tij psikik i është kryer dhe pritet raporti përfundimtar.
Për motivin e përfolur se është ndarë me gruan, mësohet se i njëjti është në procedura të divorcit, por që para policisë nuk e ka thënë që ky është motivi. Mendohet se shkaku i divorcit me gruan ka ardhur si pasojë e ushtrimit të dhunës ndaj saj.
Është zbuluar se Hyseni ka qenë konsumues i lëndëve narkotike dhe më herët nuk ka pasur as edhe një rast të vetëm në polici për ndonjë vepër.
Urim Hyseni jeton në Gjermani, kishte ardhur për pushime dhe pritej të kthehej prapë atje.
Ditën e sotme bëhet dhe varrimi i Hyrije Hyseni.
