Tre persona janë arrestuar ditën e sotme në Durrës për vepra të ndryshme penale.
Uniformat blu raportojnë se një 46-vjeçar u arrestua për dhunë në familje, ndërsa një 20-vjeçar në Krujë u arrestua për trafik të lëndëve narkotike. Po ashtu në pranga ka rënë edhe një person tjetër, pasi duke drejtuar mjetin e tij ka përplasur një 31-vjeçar me motor.
Njoftimi i policisë:
Durrës/Vihen në pranga 3 shtetas, për vepra të ndryshme penale. Specialistët për Hetimin e Krimeve të Komisariatit të Policisë Durrës ndaluan shtetasi në kërkim A. R., 46 vjeç, banues në lagjen nr.14, Durrës, pasi Gjykata e Shkallës së Parë Durrës e ka dënuar me 40 ditë burgim, për veprën penale “Dhuna në familje”.
Specialistët për Hetimin e Krimeve të Komisariatit të Policisë Krujë arrestuan në flagrancë shtetasin A. M., 20 vjeç, banues në Krujë, pasi gjatë kontrollit fizik të ushtruar nga shërbimet e Policisë, iu gjet dhe iu sekuestrua një sasi e vogël lënde e dyshuar narkotike kanabis. Në vijim të veprimeve për këtë rast, rezultoi se 20-vjeçari ishte me masë sigurie “Arrest në shtëpi”, caktuar nga Gjykata për veprimtari kriminale në fushën e kalimit të paligjshëm të kufirit.
Specialistët e Qarkullimit Rrugor arrestuan ne flagrancë shtetasin A. S., 41 vjeç, banues në Maminas, Durrës, pasi duke drejtuar automjetin, ka përplasur motomjetin me drejtues shtetasin V. H., 31 vjeç, banues në Maminas, Durrës, i cili ndodhet në kujdesin e mjekëve. Materialet procedurale i kaluan Prokurorisë, për veprime të mëtejshme.
