Frenojnë çmimet e pronave, normat e interesit “në pritje”
Cikli i rritjes së shpejtë të çmimeve të pasurive të paluajtshme ka frenuar, duke i bërë pronat një alternativë më pak tërheqëse investimi, të paktën në një afat të mesëm. Nga ana tjetër, Bankat Qendrore kanë nisur uljen e normave të interesit, megjithëse ka ende pasiguri nëse kjo ulje do të vazhdojë. Sidoqoftë, tregu ofron investime financiare me kthime të kënaqshme, sidomos për ata investitorë që kanë oreks më të madh për rrezik
“Flaka” inflacioniste, që u shfaq në ekonomi në vitin 2022, duket se për momentin po shuhet. Inflacioni në Shqipëri, prej muajsh, ndodhet poshtë objektivit të Bankës së Shqipërisë, aq sa, në mënyrë deri diku të papritur, Këshilli Mbikëqyrës vendosi më datë 3 korrik të ulë normën bazë të interesit nga 3.25% në 3%.
Kjo ishte ulja e parë e normës bazë të interesit që prej periudhës së pandemisë dhe njëkohësisht solli edhe pikën e kthesës në trajektoren e politikës monetare, pas një cikli shtrëngimi të shpejtë në vitin 2022 dhe një ecurie më të qëndrueshme, me një rritje të vetme, në 2023.
