Një vrasje ka ndodhur dje në fshatin Pakashticë të Komunës së Podujevës. I vrarë ka mbetur një 30-vjeçar me inicialet M.K, derisa si i dyshuar për vrasje është arrestuar një 34-vjeçar me inicialet F.B.
Sipas raportimeve të mediave, viktima dhe i dyshuari për vrasje ishin baxhanakë dhe se vrasja dyshohet se ka ndodhur aksidentalisht, derisa burrat po bënin gjueti në male.
“Sot rreth orës 16:00, kemi pranuar informatën për një rast të vrasjes që ka ndodhur në fshatin Pakashticë të Podujevës. Lidhur me këtë rast në vendngjarje, policia ka arrestuar një person të dyshuar: F.B mashkull 34 vjeç/ Në vendngjarje janë sekuestruar , dy armë e gjuetisë. Viktimë në këtë rast është M.K (mashkull), 30 vjeç, vdekjen e të cilit e ka konstatuar ekipi mjekësor në vendin e ngjarjes”, ka thënë zëdhënësja e Policisë së Kosovës për Rajonin e Prishtinës, Florie Ahmeti.
Ahmeti ka thënë se hetuesit policor janë duke punuar në koordinim me prokurorin për të ndriçuar dhe sqaruar të gjitha rrethanat që kanë të bëjnë me rastin.
Për rastin janë deklaruar edhe nga Prokuroria Themelore në Prishtinë. Zëdhënësja e kësaj prokurorie, Laureta Ulaj ka thënë për Gazetën Express se aktualisht janë duke u ndërmarrë të gjitha veprimet e nevojshme hetimore për t’i sqaruar rrethanat e rastit.
“Ju njoftojme se prokurorja kujdestare ka dale ne vendin e ngjarjes, ku ekipi mjekesor ka konstatuar vdekjen e nje personi. Aktualisht jane duke u ndermarre te gjitha veprimet e nevojshme hetimore per t’i sqaruar rrethanat e rastit. Per zhvillimet e tjera do t’ju njoftojme me kohe”, thuhet në njoftimin e Prokurorisë.
/Priza.al/
