Klina u trondit mbrëmë nga një vrasje që ndodhi rreth kohës së iftarit. Atje mbeti i vrarë një 23-vjeçar dhe u plagosën dy vëllezërit e tij. Për rastin deri tash janë arrestuar pesë persona. Më poshtë gjeni një përmbledhje të krejt asaj çka dihet për këtë rast tragjik.
Një vrasje ka ndodhur mbrëmë në Klinë, ku ka mbetur i vdekur një i ri dhe janë plagosur dy të tjerë.
Ngjarja ka ndodhur rreth orës 20:43 minuta, atëherë edhe kur ishte njoftuar Policia se në Klinë ka pasur të shtëna armësh dhe të plagosur.
Rastin e ka konfirmuar Fadil Gashi, zëdhënës i Policisë për Rajonin e Pejës.
“Në 20:43 minuta policia është njoftuar se ka të shtëna me armë zjarri dhe dyshohet për të plagosur. Me të arritur në vend të ngjarjes, është konstatua se dy persona janë të lënduar. Janë dërguar në Qendrën e mjekësisë familjare pastaj janë dërguar në emergjencën e Pejës. Pas pak kohe, mjeku kujdestar e ka konfirmuar vdekjen e njërës viktimë”, tha Gashi.
Sipas raportimeve të mediave, i vrari dhe të plagosurit janë vëllezër mes vete. Ata raportohet se kishin dalë për iftar me familje në një restorant, në parkingun e të cilit edhe ndodhi rasti tragjik.
Këto detaje s’janë konfirmuar nga autoritetet. Për ngjarjen deri tani janë arrestuar tre persona, derisa dy të tjerë janë shoqëruar në Stacionin e Policisë.
“Tre persona janë arrestuar që dyshohet se janë të involvuar në rast dhe dy të tjerë janë shoqëruar”, thanë në përgjigjen e Policisë së Rajonit të Pejës.
Edhe Prokuroria Themelore në Pejë ka thënë se dy prokurorë të shtetit nga Departamenti i Krimeve të Rënda të Pejës kanë dalë në vendin e ngjarjes.
“Një person ka humbur jetën si pasoje e të shtënave me armë zjarri dhe janë plagosur dy persona. Ne vendin e ngjarjes kane dal dy prokuror të shtetit nga Departamentit të Krimeve të Renda në Prokurorinë Themelore të Pejës dhe Policia e Kosovës”, tha zëdhënësi i Prokurorisë në Pejë, Shkodran Nikçi./gazeta Express
