Gazetari dhe komentatotri sportiv i njohur shqiptar, Dritan Shakohoxha, ka njoftuar se nuk do të komentojë më ndeshjet e futbollit. Ai njoftoi tërheqjen nga profesioni gjatë lidhjes nga stadiumi Wembley për RTSH, para ndeshjes Angli-Danimarkë.
“Kjo do të jetë ndeshja e parafundit që komentoj. Finalja e të dielës së ardhshme do jetë komenti im i fundit. Vjen një ditë që duhet ta lësh edhe atë që dashuron më shumë, në një mënyrë apo tjetër” u shpreh Shakohoxha.
Komentet me emocion, por sidomos batutat që Shakohoxha bën gjatë ndeshjeve, e kanë bërë atë komentatorin më të dashur për shqiptarët. Madje ka nga ata tifozë që nuk mund t’i shohin dot ndeshjet pa komentet e tij. Ndërsa vetë Shakoja gjatë intervistave që ka dhënë, ka theksuar se batutat atij i vijnë duke komentuar ndeshjet, dhe se nuk i përgatit ato më parë. Madje ai pas ndeshjes i ka harruar batutat që ka thënë.
Komentator futbolli në Shqipëri prej 30 vitesh, si dhe gazetar sportiv, ai ka mbajtur postin e drejtorit në sektorin e sportit në Digitalb, por u shkarkua disa muaj më parë. Një nga shkaqet që mund të ketë sjellë shkarkimin e Shakohoxhës është presidenti i FSHF-së Armand Duka.
Duka ka aksione tek Super Sport, dhe kohët e fundit ai ka pasur një përplasje të ashpër me Shakohoxhën, i cili gjatë komentimeve të ndeshjeve në Superiore apo dhe ato të kombëtares ka thumbuar dhe sulmuar institucionin e FSHF-së. Komentatori Shakohoxha njihej dhe për lobimet që bënte për të grumbulluar lojtarë në kombëtare, por pas ndërprerjes së bashkëpunimit me Dukën ai nisi dhe sulmet ndaj tij, ç’ka solli dhe shkarkimin e tij nga Super Sport.
Ndërkaq më 8 shkurt u publikua emri i drejtuesit të ri që u vendosur në krye të “SuperSport”. Ai është Egi Duro, një gazetar i njohur i cili merr drejtimin e paketës së kanaleve sportive në “Digitalb”, pas një angazhimi të gjatë këtë platformë. Më shumë se 15 vite përvojë sjellin Egi Duron në drejtimin e “SuperSport”, pas ikjes së Dritan Shakohoxhës nga ky pozicion.
/Priza.al/
