Një plagosje me armë zjarri ka ndodhur mëngjesin e sotëm në Lezhë, ku mbeti i lënduar 54-vjeçari, Agron Puka. Mësohet se 54-vjeçari është qëlluar me armë zjarri nga një person i pa identifikuar, teksa po lëvizte me automjet në fshatin Rrilë. Fatmirësisht i plagosur është jashtë rrezikut për jetën.
“Rreth orës 08:00, në fshatin Rrilë, shtetasi A. P., 54 vjeç, banues në fshatin Rrilë, duke lëvizur me automjet, është plagosur me armë zjarri nga 1 person ende i paidentifikuar. 54-vjeçari është transportuar në spitalin rajonal të Lezhës, ku është në kujdesin e mjekëve (aktualisht jashtë rrezikut për jetën). Shërbimet e Policisë, me marrjen e njoftimin, kanë shkuar menjëherë ne vendngjarje, është rrethuar zona dhe janë ngritur pika kontrolli. Njëkohësisht, në ndihmë të Policisë vendore, janë nisur Forcat Kombëtare të Sigurisë të Njësisë Shkodër.
Grupi hetimor, në drejtimin e Prokurorisë, vijon punën për sqarimin e rrethanave të ngjarjes dhe për identifikimin dhe kapjen e autorit”, njofton policia.
