Presidenti i Turqisë, Rexhep Taip Erdogan, priti në vilën e tij në Stamboll, Vahdettin Mansion, homologun serb, Aleksandër Vuçiç. Ata biseduan për një sërë çështjesh në takimin që zgjati rreth dy orë. Erdogan nuk dha shumë detaje, ndryshe nga Vuçiç.
Takimi ishte i mbyllur për shtypin.
Duke komentuar takimin e tij me Erdoganin, Vuçiç tha se “marrëdhëniet e mira midis Serbisë dhe Turqisë janë një kusht për ruajtjen e stabilitetit” në rajonin e Ballkanit. Presidenti serb konfirmoi se palët diskutuan për dialogun Prishtinë-Beograd dhe rëndësinë e arritjes së një zgjidhjeje kompromisi.
“Kur flisni me dikë për më shumë se dy orë, është e qartë se i keni mbuluar të gjitha temat. Unë jam i kënaqur, çdo bisedë me Erdoganin është gjithmonë e dobishme,” tha Vuçiç.
Vlen të theksohet se kjo vizitë e Vuçiç vjen pasi Erdogan tha se do të ndihmojë Kosovën në arritjen e njohjeve të reja për pavarësinë. Ndër të tjera, dy presidentët folën edhe për thellimin e bashkëpunimit në një sërë fushash, por me fokus të veçantë në ekonomi.
Vuçiç nënvizoi se në vitin e fundit, niveli i shkëmbimeve tregtare ishte në 1.3 miliardë euro, ndërsa paraqiti synimin që këtë vit të jetë 2 miliardë. Ndër të tjera paralajmëroi dhe një vizitë zyrtare të presidentit turk në Serbi brenda këtij viti.
/Burimi: AA/ Përshtati Priza.al/
