Kompania mëmë e Facebook, Meta, është gjobitur me 1.2 miliardë euro për keqpërdorimin e të dhënave të njerëzve gjatë transferimit të tyre mes Evropës dhe Shteteve të Bashkuara.
Lëshuar nga Komisioni i Irlandës për Mbrojtjen e të Dhënave (DPC), kjo është gjoba më e madhe e vendosur sipas ligjit të Rregullores së Përgjithshme për Mbrojtjen e të Dhënave të BE-së për privatësinë.
GDPR përcakton rregullat që kompanitë duhet të ndjekin për të transferuar të dhënat e përdoruesve jashtë BE-së.
Meta deklaroi se do të apelojë vendimin, që e quajti “të pajustifikuar dhe të panevojshëm”.
Në thelb të këtij vendimi është përdorimi i klauzolave standarde kontraktuale (SCC) për të zhvendosur të dhënat e Bashkimit Evropian në SHBA.
Këto kontrata ligjore, të përgatitura nga Komisioni Evropian, përmbajnë masa mbrojtëse për të siguruar që të dhënat personale të mbrohen kur transferohen jashtë Evropës.
Por ka shqetësime se këto flukse të dhënash ende i ekspozojnë evropianët ndaj ligjeve më të dobëta të privatësisë së SHBA-së dhe inteligjenca amerikane mund të ketë qasje në të dhënat e tyre.
