Kreu i Komunës së Drenasit në Kosovë, i cili është shtetas i Shqipërisë ka votuar sot familjarisht në kryeqytet për zgjedhjet vendore.
Ramiz Lladrovci, është një nga figurat kyçe të Lëvizjes Popullore të Kosovës dhe një ndër katër pushkët e aksioneve të para të UÇK-së. Ai është ish i burgosur politik nga regjimi i Serbisë në vitet 1986, 1988, 1992, 1993.
Pas votimit sot në Tiranë, Lladrovci kujtoi ditën e parë kur i torturuar nga Prishtina arriti në Spitalin e Tiranës.
“Ajo ditë e 1992-tës, mbetet e paharrueshme. Në Tiranë arrita i torturuar rëndë, i sapo liruar nga burgu i Prishtinës. Nga Kosova, me përcjelljen e dy miqve të mi, të Hashimit dhe Kadriut, kemi shkuar drejt në Spitalin e Tiranës”, ka shkruar Lladrovci.
Postimi i plotë:
Tirana, si çdo herë e bukur. Me një pjesë të familjes, kemi kryer detyrimin tonë qytetar, për ta dhënë votën në zgjedhjet vendore. Gjatë votimit e kujtova situatën se si dukej Tirana në ditët e para kur hyra në Tiranë.
Ajo ditë e 1992-tës, mbetet e paharrueshme. Në Tiranë arrita i torturuar rëndë, i sapo liruar nga burgu i Prishtinës. Nga Kosova, me përcjelljen e dy miqve të mi, të Hashimit dhe Kadriut, kemi shkuar drejt në Spitalin e Tiranës. Aty për lëndimet e mia u përkujdesën dr. Shaipi dhe kirurgu Dr. Mustafa Xhani, biri i Baba Faja Martaneshit.
Gjithmonë kam ndjenja të fuqishme për Tiranën tonë, zemrën e kombit.
Po, nga ato ditë të vitit 1992, Tirana ka ndryshuar shumë për të mirë. Sot, Tirana ka edhe vlera të shumta kulturore e turistike, ka hyrë në agjendat turistike për t’u vizituar si kryeqytet në konkurrencën globale.
Tirana, çdo ditë po ndryshon për të mirë dhe dinamika e zhvillimit është shumë e madhe. Vota ime besoj të jetë në shërbim të Tiranës dhe të gjithë shqiptarëve që do të krenohen me kryeqytetin shqiptar. Suksese!
