Lojtari i Kroacisë U-21, Mario Vuskoviç , i cili luan për klubin gjerman të kategorisë së dytë Hamburg SV, është dënuar me dy vjet për doping, tha të enjten Federata Gjermane e Futbollit (DFB).
Mbrojtësi, i cili iu bashkua Hamburgut në vitin 2021, kishte rezultuar pozitiv për substancën që rrit performancën EPO.
“Të gjitha analizat tregojnë një gjetje qartësisht të dukshme të një substance të huaj për trupin që është EPO, edhe nëse është në sasi të reduktuara,” tha Stephan Oberholz, kreu i gjykatës sportive të DFB.
Ai tha se mostrat e Vuskoviçit ishin testuar në mënyrë të përsëritur. Rezultatet u konfirmuan edhe nga ekspertë të tjerë të dopingut jashtë Gjermanisë dhe lojtari “nuk mund të jepte prova të një gjetje të gabuar dopingu”.
Shkelja e parë e Vuskoviçit dhe sasia e vogël e EPO-s nënkuptonin se ky nuk ishte një rast i dopingut sistematik, tha DFB.
Duke pasur parasysh moshën e re të lojtarit të kombinuar me ndikimin që mund të ketë një pezullim i gjatë në zhvillimin e karrierës së tij të ardhshme, DFB zgjodhi një pezullim dy-vjeçar dhe jo një më të gjatë.
