Ministri i Jashtëm rus Sergei Lavrov tha sot se Moska nuk mund ta imagjinonte një vendim të tillë nga disa vende të NATO-s për të ndaluar udhëtimin e ministrit të jashtëm rus, duke theksuar se një vendi sovran si Serbia po i mohohej e drejta për politikën e tij të jashtme. .
Askush nuk do të jetë në gjendje të shkatërrojë marrëdhëniet tona me Serbinë, tha sot ministri i Jashtëm rus.
Maqedonia e Veriut, Bullgaria dhe Mali i Zi ishin vendet që e ndaluan fluturimin e avionit të tij nga Moska në Beograd.
Lavrov tha se ministrit të Jashtëm serb Nikola Selakoviq i ishte dërguar ftesë për të vizituar Rusinë sa më shpejt të jetë e mundur dhe shprehu shpresën se nuk do të ketë probleme me fluturimin e avionit të tij, si në rastin aktual “kur Brukseli humbi fytyrën”, tha ai.
Planifikuam të diskutonim një axhendë të gjerë, një partneritet strategjik me zhvillim të shpejtë dhe çështjet ndërkombëtare. “Natyrisht, liderët e Brukselit nuk donin të na jepnin një platformë për bisedime në Beograd, ku ne do të konfirmonim qëndrimin e Rusisë për Kosovën dhe Bosnjë e Hercegovinën, si dhe do të mbështesim nismën e Beogradit për Ballkanin e Hapur”, tha Lavrov.
Por Lavrov ka bërë një gabim kur ka thënë se kjo nismë është e Serbisë. Ballkani i Hapur është themeluar nga Serbia, Shqipëria dhe Maqedonia e Veriut. Kosova e Bosnjë-Hercegovina vazhdojnë ta refuzojnë, ndërkohë Mali i Zi ka dhënë sinjale se mund t’i bashkohet treshes themeluese këto ditë.
I pyetur se çfarë masash po ndërmerren për mbajtjen e takimit, Lavrov tha se qëndrimi i Serbisë është i njohur dhe se presidenti (Aleksandar) Vuçiç ka theksuar se nuk do të merret me politikë antiruse edhe pse BE-ja e dëshiron pikërisht këtë.
Ata duan që të gjithë kandidatët të marrin një pozicion me karakter anti-rus. Është treguar se sa vlejnë Mali i Zi dhe vendet e tjera të NATO-s. Ato shërbejnë vetëm për të ndëshkuar dhe shtypur Rusinë, shtoi Lavrov, duke theksuar se Moska kurrë nuk do të ndërmarrë hapa që do t’i vështirësojnë marrëdhëniet midis vendeve.
