Ditën e sotme opozita do të protestojë para Parlamentit, ndërkohë që janë zbardhur masat e marra nga forcat e policisë.
Pritet të bëhet si në protestën e së shtunës, ku një kordon policor do të qëndrojë para protestuesve. Do të jenë punonjësit e rendit dhe ato të “Shqiponjës” që do të formojnë kordonin përreth protestuesve, kryesisht përpara derës së parlamentit.
Nuk dihet nëse protestuesit do të tentojnë të hyjnë në Kuvend, por brenda në sallë do të ketë punonjës së Forcave të Ndërhyrjes së Shpejtë. Ndërkohë që, Forcat e Ndërhyrjes së Shpejtë do të ndahen në tre pjesë.
Nje pjesë do vendosen në bulevardin “Zhan Dark” , pjesa tjetër brenda rrethimit të Xhamisë së Namazgjasë, dhe një pjesë tjetër brënda ambienteve të Parlamentit, ku aty pritet të vendosen dhe autobotë me ujë, që në rast përshkallëzimi të bëhet shpërndarja e turmës.
Gjithashtu të pranishme do jenë edhe Forca speciale të RENEAS. Mësohet se pranë Parlamentit do të ketë edhe punonjës të Gardës së Republikës, që do vëzhgojnë e parandalojnë protestuesit nëse do të ketë tentativë nga ana e protestuesve për të hyrë në godinë. Të gjithë punonjësit do jenë të pajisur me maska kundra gaz.
Policia do marrë masa edhe për bllokimin e rrugëve, ku rreth orës 15:00 do ketë kufizime të qarkullimit në rrugën “Xhorxh Bush” dhe pjesërisht në bulevardin “Zhan Dark”. Por edhe një pjesë e rrugës së Elbasanit. Forca policore do ketë edhe në kryeministri, në rast se protestuesit do zhvendosen aty.
