Ngjarja e ndodhur pak pas mesnate ku persona ende të paidentifikuar qëlluan drejt ambienteve të televizionit “Top Channel”, ka zgjuar vendin të tronditur. Sulmi me breshëri kallashnikovi la të vrarë rojen e objektit, 60-vjecarin Pal Kola.
Njoftimi i policisë: “Më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel.
Si pasojë e të shtënave ka humbur jetën roja i sigurisë shtetasi Pal Kola 60 vjeç (punonjës i një shoqërie për ruajtjen fizike të objekteve).
Është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve”
Ngjarja ndodhi rreth orës 1:00 të 27 marsit. Plumbi i marrë la fillimisht të plagosur e më pas i mori jetën 60-vjeçarit. Familjarët e tij treguan ditën e sotme jashtë kamerave se Kola kishte 6 muaj që punonte si roje sigurie pranë Top Medias. Ai jetonte në zonën e Sharrës, dhe çdo ditë shkonte në këmbë drejt ambienteve të televizionit kombëtar, ku punonte si roje objekti.
Autorët ende mbeten të paidentifikuar, por mëngjesin e sotëm, u gjet një automjet i djegur në Golem të Kavajës. Ai dyshohet se është përdorur nga autorët e ngjarjes.
Automjeti ishte tip “Range Rover” me targa të vjedhura. Brenda tij u gjet arma e zjarrit tip kallashnikov, nga plumbat e së cilës humbi jetën 60-vjeçari i pafajshëm.
Sakaq, siç shihet edhe nga pamjet e mëposhtme, dëmet materiale janë të konsiderueshme në godinën e televizionit. Megjithatë ato mbeten të papërfillshme në raport me jetën e humbur.
Dyshohet se një nga pistat ku po hetohet mund të jetë “reality show” “Big Brother VIP” i cili ka prodhuar vazhdimisht polemika në rrjet.
Një tjetër pistë është misioni apo puna e televizionit “Top Channel”.
Politikanë të shumtë, të pozitës e opozitës kanë dënuar ngjarjen dhe kanë kërkuar vendosjen përpara drejtësisë të autorëve. Këtë qëndrim ka mbajtur edhe vetë ministri Çuçi, i cili ka garantuar gjithashtu se Policia e Shtetit po punon për zbardhjen e ngjarjes.
