Tirana është kthyer në një kantier ndërtimi, ku nuk ka të ndalur betoni. Në mes të ditës, aty ku edhe njerëzit shfrytëzojnë fundjavën për tu relaksuar e për të marrë ajër të pastër, ndodh krejt e kundërta. Punimet vijojnë në çdo orë të ditës, duke ngritur një shtëllungë pluhuri në ajër.
Pamjet që sjell “Priza.al” demostrojnë papërgjegjshmërinë që ndodh në Rrugën “Faik Konica”. Bllokimi i një pjese të madhe të kësaj toke për ndërtimin e një pallati, ka sjellë pluhur, trafik, por edhe vështirësi në devijimin e lëvizjes së makinave.
Banorët ankohen për zhurmat e pluhurin, ndërsa çdo ditë përballen me surpriza të pakëndshme. Teksa punimet po kryhen me ritme të shpejta për të arritur objektivat e vendosura, qytetarët përballen me trafikun e zhurmën, e cila iu është kthyer në një stres.
Burimet bëjnë me dije për “Priza.al” se punimet për këtë pallat vijojnë pa ndërprerë, e madje tre herë brenda ditës, duke ju kthyer në makth banorëve. E jo vetëm kaq, por edhe kalimtarët e rastit duhet të mbajnë jo vetëm maskën ndaj koronës, por mundësisht të kenë edhe një ekstra, pasi ajri ndotës sjell probleme të mëdha për shëndetin.
