Valtteri Mulkahainen, mësues dhe fotograf amator nga Sotkamo, Finlandë, ka shpërndarë disa fotografi tepër të rralla të një grupi arinjsh të vegjël duke vallëzuar në pyll. Ky është një moment ku natyra shfaq gjithë bukurinë e saj të pafundme.
Në qershor 2013, teksa shëtiste në taigën finlandeze pranë qytetit të Martinselkonen, Valtteri po qëndronte në një pikë të favorshme dhe të mbrojtur rreth 50m larg një lëndine të vogël në pyll. Tre arinj të vegjël dolën nga pemët dhe për një moment atij iu duk se po dëshmonte një eksperiencë unike e magjike. “Tre këlyshët nisën të sillen si fëmijë të vegjël,” tha ai.
“Ata po luanin, e madje nisën disa përleshje miqësore. Mua më dukej sikur isha në një kënd lojrash para shtëpisë time, ku fëmijë të vegjël luanin me njëri-tjetrin. Arinjtë më dukeshin tamam si fëmijë. Në një moment të tre ata u ngritën në këmbët e pasme dhe nisën të shtyjnë njëri-tjetrin. Ata dukej sikur po kërcenin në një rreth”.
Nga pika e shikimit të Valtteri, arushët nuk mund ta dallonin prezencën e tij, ndërsa ai kishte pamje të përkryer të lojës së këlyshëve: “I fotografova këlyshët dhe arushën gjithë mbrëmjen e gjithë natën.”
Valtteri duket se ka qenë me shumë fat, pasi arinjtë janë pothuajse kudo në Finlandë, por ato shihen rrallë nga njerëzit, pasi një kombinim i pabesueshëm i shqisave dhe aftësisë për të lëvizur vjedhurazi, i lejon ata të tërhiqen shpejt kur e kuptojnë se kanë shoqëri.
Finlanda është një nga tre habitatet më të mira për arinjtë e murrmë, së bashku me Suedinë dhe Rumaninë. Popullata e tyre në Finlandë llogaritet të jetë diku te 2,020 deri në 2,130.
/Burimi Happymag.tv/ përshtati në shqip Priza.al/
