Më shumë se 9,500 hektarë bimësi u dogjën të dielën në Pirenejtë e Francës jugperëndimore, ku shpërtheu zjarri i parë i madh i vendit në vitin 2023 dhe “kaloi kufirin me Spanjën”, sipas prefekturës. Flakët “kaluan kufirin me Spanjën”, theksoi prefektura në një njoftim për shtyp.
Rreth 300 banorë të zonës, të cilët u desh të evakuoheshin nga shtëpitë e tyre gjatë ditës, “kryesisht kanë mundur të kthehen”, shtoi ai dhe sqaroi se “zjarri ende nuk është vënë nën kontroll, por situata është stabilizuar në aspektin e mbrojtjes të banorëve dhe pronës”.
Më herët, ministri i Brendshëm Gerald Darmanen njoftoi se flakët ishin përhapur “në një sipërfaqe prej 9,300 hektarësh në Pirenejtë lindorë” dhe se “300 njerëz duhej të evakuoheshin nga shtëpitë e tyre”. Brigada e zjarrfikësve foli mbrëmë për një sipërfaqe prej 9500 hektarësh.
Ministri pritet të vizitojë vendin gjatë ditës së sotme për të “mbështetur” forcat zjarrfikëse dhe ekipet e shpëtimit që po punojnë.
Zjarri ka shpërthyer mëngjesin e djeshëm, në mes të komuniteteve Cherber dhe Banyul-sur-Mer dhe është forcuar nga tramuntana e fortë – erërat e veriut – në këtë rajon, i cili po vuan nga një thatësirë e madhe. Gjashtë avionë morën pjesë në operacionin e shuarjes.
Thatësira në Pirenejtë lindorë, e lidhur me ndryshimet klimatike, ka shkaktuar tashmë kufizime dhe tensione. Katër fshatra kanë mbetur pa ujë të pijshëm që nga e premtja, ndërsa fermerët kanë frikë se mbijetesa e tyre është në rrezik pasi fillon pranvera historikisht e thatë.
