Dy vite pas fillimit të pandemisë së koronavirusit shpresat se fundi i pandemisë mund të jetë afër po rriten gjithë e më shumë, megjithëse jemi në kulmin e variantit Omicron.
Hans Kluge, i cili është drejtori rajonal për Europën pranë Organizatës Botërore të Shëndetësisë ka bërë me dije se kontinenti po shkon drejt një faze të fundit . Ai parashikoi se vala aktuale omikron në Europë do të bjerë pasi njerëzit do të kenë fituar imunitet ndaj COVID-19. Imunizimi i popullatës do të arrihet falë vaksinimit dhe pasi njerëzit të jenë shëruar nga virusi. Kësaj i shtohet edhe efekti pozitiv i stinës ku Kluge iu referua ardhjes së pranverës dhe verës.
Sipas vlerësimit të OBSH-së deri në mars mund të jenë infektuar në mbarë Europën rreth 60 për qind e njerëzve me variantin e ri. Për shkak të mutacioneve të mundshme të reja Kluge megjithatë tërhoqi vëmendjen për të pasur kujdes pasi sipas tij SARS-CoV-2 na ka surprizuar më shumë se një herë dhe se kujdesi nuk është asnjëherë i tepërt.
/Priza.al/
