Gjykata Kushtetuese ka vendosur hapjen e listave 100% për zgjedhjet pasardhëse. Ky institucion ka pranuar pjesërisht kërkesën e partive Bindja Demokratike dhe Lëvizja Demokratike Shqiptare për herësin.
Në vendimin e marrë është vendosur që të shfuqizohet neni që shpërndan mandatet sipas herësit.
Gjykata Kushtetuese thekson pika 3 e nenit 163 është e pa pajtueshme me Kushtetutën.
NJOFTIMI I GJYKATES
Gjykata Kushtetuese e Republikës së Shqipërisë mori në shqyrtim në seancën plenare publike të datës 09.06.2021 çështjen me kërkuese partinë “Bindja Demokratike” dhe partinë “Lëvizja Demokratike Shqiptare”, me objekt shfuqizimin e nenit 163 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar me nenin 21 të ligjit nr. 118/2020, si i papajtueshëm me Kushtetutën e Republikës së Shqipërisë.
Në përfundim të shqyrtimit, Gjykata Kushtetuese
VENDOSI:
– Pranimin pjesërisht të kërkesës.
– Shfuqizimin e pikës 3 të nenit 163 të Kodit Zgjedhor si të papajtueshëm me Kushtetutën.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.
