Policia e Vlorës ka goditur një bazë të trafikut të lëndëve narkotike në qytetin bregdetar. Pas informacionit të marrë, policia ushtroi kontroll në banesën e shtetasit A.A., ku u gjetën dhe sekuestruan 52 doza me lëndë të dyshuar narkotike kokainë dhe 90 doza me lëndë të dyshuar narkotike kanabis.
Gjithashtu u sekuestruan edhe 1 peshore elektronike, 3 aparate celulare dhe një shumë parash e dyshuar e përfituar nga kjo veprimtari kriminale.
Njoftimi i plotë:
Vlorë/Goditet, nga Seksioni për Hetimin e Narkotikëve, 1 rast i veprimtarisë kriminale në fushën e narkotikëve.
Finalizohet operacioni policor i koduar “Local”.
Vihen në pranga 2 shtetas që bashkëpunonin për shitjen e lëndëve narkotike, në doza.
Sekuestrohen doza kokaine dhe kanabisi, gati për shitje, dhe një shumë parash e dyshuar e përfituar nga kjo veprimtari kriminale.
Specialistët e Seksionit për Hetimin e Narkotikëve, në vijim të punës për goditjen e paligjshmërisë, bazuar në informacionet e marra në rrugë operative se dy shtetas shpërndanin lëndë narkotike, në qytetin e Vlorës, kanë organizuar dhe finalizuar operacionin “Local”, për lokalizimin dhe kapjen e tyre.
Si rezultat i këtij operacioni u arrestuan në flagrancë shtetasit:
– A. A., 58 vjeç dhe V. V., 27 vjeç, të dy banues në Vlorë.
Gjatë kontrollit në banesën e shtetasit A. A., në lagjen “1 Maji”, shërbimet e Policisë gjetën dhe sekuestruan 52 doza me lëndë të dyshuar narkotike kokainë dhe 90 doza me lëndë të dyshuar narkotike kanabis. Gjithashtu, në cilësinë e provës materiale u gjetën dhe u sekuestruan 1 peshore elektronike, 3 aparate celulare dhe një shumë parash e dyshuar e përfituar nga kjo veprimtari kriminale.
Nga veprimet hetimore ka rezultuar se shtetasi A. A. bashkëpunonte me shtetasin V. V., për shpërndarjen e dozave të kokainës dhe të kanabisit, në zona të ndryshme të Vlorës.
Materialet i kaluan Prokurorisë, për veprime të mëtejshme procedurale.
