Dalin detaje të reja në lidhje me ngjarjen e 23 majit në Durrës, e cila përfundoi me vdekjen e një 53-vjeçarit. Mësohet se shtetasi me inicialet M.A, ka qëllua me grusht 53-vjeçarin me inicialet Z.K., ku ky i fundit është rrëzuar përtokë duke përplasur kokën në gur. Fatkeqësisht, lëndimi ishte shumë i rendë dhe pas 4 ditësh ai ndërroi jetë tek Spitali i Traumës.
Policia deklaroi se familjarët nuk kishin pretendime, teksa ata kanë thënë se 53-vjeçari vuante nga tensioni i lartë prandaj është rrëzuar. Tashmë autori M.A, akuzohet për plagosje të rëndë me dashje me pasojë vdekjen.
NJOFTIMI NGA POLICIA
Durrës
Specialistët për Krimet në Komisariatin e Policisë Durrës pas një pune hetimore disa ditore kanë bërë të mundur identifikimin dhe arrestimin e shtetasit M.A., 37 vjeç, i cili dyshohet se ka goditur një shtetas, ku për pasojë ka ndërruar jetë.
Konkretisht, më datë 23.05.2021, në lagjen Nr.13, Plazh, Durrës dyshohet se për motive të dobëta ka goditur shtetasin Z.K.,53 vjeç, banues në Durrës, i cili është rrëzuar në tokë duke i shkaktuar dëmtime, ku pas mjekimit të marrë në Spitalin Rajonal Durrës është transferuar për mjekim të specializuar në Spitalin e Traumës Tiranë ku më datë 27.05.2021 ka ndërruar jetë.
Policia e Durrësit menjëherë sapo ka marrë dijeni për ngjarjen, ka kryer të gjitha veprimet procedurale sipas dispozitave ligjore, duke pyetur edhe familjarët e personit të dëmtuar, të cilët nuk kanë pasur asnjë pretendim. Grupi hetimor vijoi hetime më të thelluara duke bërë të mundur zbardhjen e plotë të ngjarjes dhe arrestimin ditën e djeshme të autorit të dyshuar. Materialet i kaluan Prokurorisë së Rrethit Gjyqësor Durrës për veprime të mëtejshme.
