Deputetja Rudina Hajdari do të kandidojë për subjektin politik “Nisma Thurje” në qarkun e Elbasanit. Gjatë takimeve që ka patur me qytetarët gjatë këtyre muajve, ajo është përballur me probleme të ndryshme.
Nga foltorja e Kuvendit, deputetja nuk ka kursyer kritikat. Ajo ka treguar se çfarë ka parë nga fushata e saj elektorale në fshatrat e qarkut të Elbasanit, duke shtuar se nuk ka asnjë investim prej kohës së komunizimit.
“Që në kohën e Enverit, nuk kanë hedhur asnjë kovë zhavorr. A nuk iu vjen turp? Më takon të flas në këtë mënyrë, se duhet ta kishit bërë me kohë këtë gjë. Shqipëria do bëhet! Nuk do mbajmë kusurin e mashtruesve dhe legenave që nuk kanë bërë asgjë. Këta jeni ju”, tha ajo e revoltuar.
Në zgjedhjet e vitit 2017, Rudina Hajdari u mandatua si deputete e PD. Ajo ishte e treta në listën e PD-së për qarkun e Tiranës, pas kryetarit Lulzim Basha dhe Oriola Pampurit. Tre vite më vonë ajo shfaqi qëndrime të kundërta me vendimin e opozitës për të dalë nga Parlamenti.
Duke mbajtur mandatin si deputete, ajo i dha zë kërkesave për reformimin e kodit zgjedhor që vinin kryesisht nga shoqëria civile dhe “Nisma Thurje”. Prej nëntorit të vitit 2020, kur dhe u prezantua zyrtarisht, Hajdari është pjesë e “Nismës Thurje”, e cila është zotuar “t’u kthejë shpresën” qytetarëve.
