Prokuroria e Posaçme kundër Korrupsionit dhe Krimit të Organizuar (SPAK) ka mbyllur hetimet në lidhje me ish-kandidatin e LSI-së për deputet Etion Joka dhe e ka çuar çështjen për gjykim.
Sipas hetimeve të SPAK, rezulton se Joka ka i ka ofruar një shumë prej 100 dollarësh qytetarit të identifikuar si Elis Babo, në kërkim të votës.
Ish-kandidati për deputet, do të përballet me akuzën për “korrupsion aktiv në zgjedhje”, ndërsa qytetari për korrupsion pasiv.
Pas publikimit të videos, ai u shpall në kërkim nga policia. Ai u arrestua në datën 16 tetor.
Bashkë me të, SPAK ka dërguar në gjykatë edhe Elis Babon, i cili do të gjykohet për veprën penale “korrupsion pasiv në zgjedhje”.
NJOFTIMI I SPAK
Prokuroria e Posaçme kundër Korrupsionit dhe Krimit të Organizuar ka regjistruar kryesisht procedimin penal Nr.131/2021, për veprat penale “Korrupsioni aktiv në zgjedhje” dhe “Korrupsioni pasiv në zgjedhje”, bazuar në pamjet filmike të transmetuara në datën 23 Prill 2021 në median audiovizive, konkretisht në kanalin televiziv “Top News”.
Nga të dhënat e përfituara nga pamjet filmike, si dhe nga tërësia e veprimeve hetimore të kryera në kuadër të këtij procedimi penal, rezultoi e provuar se: shtetasi Etion Joka, kandidat për deputet në Qarkun e Tiranës në zgjedhjet e përgjithshme parlamentare të datës 25 Prill 2021, i ka ofruar një shumë prej 100 (njëqind) USD, shtetasit Elis Babo, në këmbim të sigurimit të votave.
Në përfundim të hetimeve në datë 26.11.2021, Prokuroria e Posaçme ka përcjellë në Gjykatën e Shkallës së Parë për Korrupsionin dhe Krimin e Organizuar kërkesën për kalim për gjykim dhe aktet e procedimit penal Nr. 131/2021, ndaj të pandehurve:
1. Etion Joka, i akuzuar për kryerjen e veprës penale “Korrupsioni aktiv në zgjedhje” parashikuar nga neni 328 i Kodit Penal.
2. Elis Babo, i akuzuar për kryerjen e veprës penale “Korrupsioni pasiv në zgjedhje” parashikuar nga neni 328/b i Kodit Penal.
/Priza.al/
