Irani ka arrestuar një nga drejtuesit e protestave që po vijojnë prej mbi 4 muajsh në vend, me akuzën e marrëdhënieve me inteligjencën e Shteteve të Bashkuara dhe Britanisë së Madhe. Sipas prokurorit të Teheranit, Ali Salehi, burri “kishte krijuar lidhje me stacionin televiziv disident në gjuhën persiane Iran International përmes shërbimeve sekrete të SHBA-së dhe Mbretërisë së Bashkuar dhe i kishte ofruar stacionit televiziv me bazë në Londër lajmet për trazirat”.
I arrestuari, emri i të cilit nuk bëhet i ditur, është dhëndri i një prej “udhëheqësve anti-revolucionarë”, i cili jeton jashtë vendit dhe ka vepruar në fshehtësi duke përdorur emrin “Rinia e rretheve të Iranit” për të thirrur demonstrata në qytete të ndryshme gjatë protestave, shtoi prokurori.
Në rrëfimet e para, i arrestuari tha se kishte edhe detyrën të paguante “kriminelët” për të krijuar trazira dhe merrte fonde nga Shtetet e Bashkuara dhe Britania e Madhe, tha Salehi, duke shtuar se “anëtarë të tjerë të grupit u arrestuan gjithashtu në provinca të ndryshme. “.
